Azərbaycan Respublikasının Prezidenti yanında Dövlət İdarəçilik Akademiyasının (DİA) təşəbbüsü ilə Konstitusiya Məhkəməsinin əməkdaşları üçün təşkil olunan “Dövlət idarəçiliyində rəqəmsal transformasiya” təlim proqramı çərçivəsində növbəti sessiya keçirilib.

Proqramın üçüncü sessiyası “Dövlət idarəçiliyində süni intellekt əsaslı rəqəmsal transformasiya” mövzusuna həsr olunub. Təlimi DİA-nın “Dövlət idarəçiliyində informasiya texnologiyaları” kafedrasının müəllimi, “Yüksəliş” müsabiqəsinin qalibi, rəqəmsal transformasiya və süni intellekt üzrə ekspert Elnur Məmmədli aparıb.

Təlim zamanı süni intellekt texnologiyalarının dövlət idarəçiliyində, xüsusilə hüquqi və inzibati fəaliyyət sahələrində tətbiqi imkanları, ixtisaslaşdırılmış rəqəmsal köməkçilərin yaradılması, süni intellekt agentləri əsasında iş proseslərinin təşkili və mürəkkəb tapşırıqların avtomatlaşdırılması məsələləri nəzərdən keçirilib.

Praktiki nümunələr əsasında məhkəmə qərarlarının təhlili, konstitusion təfsir, hüquqi mövqelərin müqayisəsi, böyük həcmli sənədlərin araşdırılması, məhkəmə təcrübəsinin sistemləşdirilməsi və hüquqi rəylərin hazırlanmasında süni intellektdən istifadə imkanları nümayiş etdirilib. Həmçinin müxtəlif informasiya mənbələrinin vahid iş prosesində birləşdirilməsi, təkrarlanan tapşırıqların avtomatlaşdırılması və analitik fəaliyyətə sərf edilən vaxtın azaldılması üsulları təqdim olunub.

Sessiyada süni intellektin tətbiqi üç əsas istiqamətdə nəzərdən keçirilib: fərdi əmək məhsuldarlığının artırılması, struktur bölmələrinin fəaliyyətinin optimallaşdırılması və təşkilati idarəetmə modelinin transformasiyası.

Bununla yanaşı, süni intellekt texnologiyalarından istifadə zamanı məlumatların məxfiliyinin qorunması, informasiya təhlükəsizliyi, alqoritmik risklərin idarə edilməsi və hüquqi məsuliyyət məsələlərinə xüsusi diqqət yetirilib. Vurğulanıb ki, süni intellekt hüquqi təhlil və qərarların hazırlanması prosesində mühüm dəstək vasitəsi olsa da, hakimin müstəqil hüquqi qiymətləndirməsini və qərarvermə məsuliyyətini əvəz etmir.

Təlim dövlət və məhkəmə idarəçiliyində süni intellekt texnologiyalarından səmərəli və təhlükəsiz istifadə, rəqəmsal alətlərin tətbiqi və iş proseslərinin optimallaşdırılması istiqamətində iştirakçıların praktiki bilik və bacarıqlarının inkişafına xidmət edib.

Qeyd edək ki, həftədə iki dəfə əyani formada keçirilən “Dövlət idarəçiliyində rəqəmsal transformasiya” təlim proqramı dekabrın 8-dək davam edəcək. Proqramı uğurla başa vuran iştirakçılara sertifikatlar təqdim olunacaq.