Azərbaycanda ev telefonlarından istifadənin sürətlə azalması sosial mediada geniş müzakirələrə səbəb olub. 

Maraqlıdır, qarşıdakı illərdə sabit rabitə vasitələrinin tamamilə yox olacağını düşünmək realdırmı?

Məsələ ilə bağlı KONKRET.az-a danışan İKT üzrə ekspert Elvin Abbasov bildirib ki, sabit rabitə vasitələri tamamilə yox olmayacaq, sadəcə texnoloji transformasiyadan keçir.

Ekspertin sözlərinə görə, stasionar telefonlar bir sıra hallarda hələ də zəruridir:

“Evdə və ya iş yerlərində sabit telefonlar heç vaxt öz aktuallığını tam itirməyə bilər. Çünki elə vəziyyətlər olur ki, müəyyən vəzifəli şəxsi, xüsusilə də dövlət qurumlarında çalışan məmuru yerində təyin etmək üçün stasionar telefona zəng etmək vacib olur. Bundan əlavə, təhlükəsiz və etibarlı rabitə baxımından da xüsusi xətlərlə gücləndirilmiş sabit telefonlara ehtiyac qalır.”

Elvin Abbasov əlavə edib ki, bəzi hallarda stasionar telefonlar şəhərin tarixi simasını qorumaq baxımından da əhəmiyyət daşıyır:

“Şəhərin qədimliyini və mədəni dəyərlərini göstərmək üçün küçələrdəki stasionar telefon köşkləri müəyyən simvolik məna daşıyır. İş yerlərində də bu telefonların istifadəsi müəyyən səviyyədə davam edəcək.”

Ekspert qeyd edib ki, əsas azalma ev təsərrüfatlarında müşahidə olunur. Bunun səbəbi isə insanların daha çox mobil rabitədən istifadə etməsidir:

“Əvvəllər stasionar telefonlar mis kabellər üzərindən fəaliyyət göstərirdi. Artıq bu texnologiya dövrünü başa vurub. Yeni mərhələdə sabit rabitə fiberoptik xətlər üzərindən təmin olunur. Yəni, mis kabel dövrü Azərbaycanda bitib, indi isə stasionar telefonlar fiberoptik texnologiyalarla təchiz edilir.”

Beləliklə, ekspertin fikrincə, sabit rabitə tamamilə yox olmasa da, yeni texnoloji platformalara keçid onun formasını və funksiyasını dəyişəcək.