Hazırda davam edən ikinci onlayn Şahmat Olimpiadasının “Top Divizionun”da iştirak edəcək Azərbaycan milli komandasının heyəti məlum olub.

GAZETTE xəbər verir ki, sentyabrın 8-də mübarizəyə qoşulacaq yığma komandamızın əsas heyətində Teymur Rəcəbov, Şəhriyar Məmmədyarov, Günay Məmmədzadə, Gülnar Məmmədova, Vüqar Əsədli və Xanım Balacayeva yer alıblar.

Bundan əlavə millimiz Olimpiadaya altı ehtiyat oyunçu da sifariş edib. Bunlar Rauf Məmmədov, Qədir Hüseynov, Türkan Məmmədyarova, Ülviyyə Fətəliyeva, Məhəmməd Muradlı və Gövhər Beydullayevadır. Komandamızın kapitanı isə Rəhim Qasımov olacaq. 

Qeyd edək ki, ikinci onlayn olimpiadanın dördüncü divizionunda yarışlar artıq başa çatıb. Avqustun 27-29-da 3-cü divizionun, sentyabrın 2-4-də isə ikinci divizionun oyunları keçiriləcək.

Sentyabrın 8-10-da isə komandamızın da qatılacağı top divizionun oyunları baş tutacaq.