Türkiyənin "Fənərbağça" klubunun futbolçusu Mesut Özil karyerası ilə bağlı yayılan iddialara münasibət bildirib.

Gazette.az xəbər verir ki, 34 yaşlı yarımmüdafiəçi bu barədə rəsmi tviter hesabında paylaşım edib.

Təcrübəli oyunçu İstanbul təmsilçisində çıxış etməyin uşaqlıq arzusu olduğunu vurğulayıb: "Uşaqlıq sevgim olan "Fənərbağça" ilə ilk 6 ayın maaşını belə almadan 3,5 illik müqavilə imzalayaraq karyera hədəfimi tamamlamışdım".

Özil karyerasını hazırkı klubunda başa vuracağını diqqətə çatdırıb: "Karyeramı "Fənərbağça"dan başqa komandada bitirməyəcəyəm. Müqavilə müddətində yeganə məqsədim bu formanı geyinməkdir. Bu qərarım çox aydın və qətidir".

Almaniya millisinin sabiq üzvü rəhbərliyin qərarlarına hörmətlə yanaşacağını sözlərinə əlavə edib: "Çox çalışacağam və özümü hər zaman hazır saxlayacağam. Hər zaman dediyim kimi: Əsas olan "Fənərbağça"dır. Bu komandanın böyük azarkeşlərinə sevgi və hörmətlərimlə".

Qeyd edək ki, Mesut Özil 2021-ci ilin yanvarında "Fənərbağça"ya keçib. O, martın 24-də baş məşqçi İsmail Kartalla məşqdə mübahisə etdiyi üçün heyətdən kənarlaşdırılıb.