Böyük Dəbilqə seriyalı “US Open” tennis turnirində qadınların mübarizəsində yarımfinal qarşılaşmaları keçirilib.

GAZETTE xəbər verir ki, korta ilk öncə qadın tennisçilərin retyinq sıralanmasında 2-ci pillədə qərarlaşan Arina Sabalenka (Belarus) ilə turnir boyu güclü rəqiblərini sıradan çıxardan 18 yaşı yenicə tamam olmuş kanadalı Leyla Fernandez çıxıblar. Gərgin keçən və 3 set davam edən qarşılaşma Fernandezin qələbəsi ilə yekunlaşıb. 2 saat 24 dəqiqə oynanılan matçda Leyla Fernandez Sabalenkanı 2-1 (7-6; 4-6; 6-4) hesabı ilə məğlub edərək karyerası ərzində ilk dəfə olaraq “US Open” tennis turnirində, ümumiyyətlə “Grand Slam” turnirlərində finala vəsiqə əldə etmiş olub.

Yamrınfinalın digər görüşündə daha bir gənc raketka ustası Emma Radukanu (B.Britaniya) ilə WTA reytinq siyahısında 18-ci pillədə qərarlaşan yunanıstanlı Mariya Sakkari üz-üzə gəliblər. “US Open”ə təsnifat mərhələsindən başlayan və rəqiblərinə bir set belə məğlub olmadan yarımfinala kimi irəliləməyi bacaran 18 yaşlı Radukanu bu qarşılaşmadan da 2-0 hesablı qələbə ilə ayrılıb. 1 saat 25 dəqiqə davam edən matçda E.Radukanu rəqibinə yalnız 5 qeymdə məğlub olub, 6-1; 6-4.

İlin son “Böyük Dəbilqə” turnirində gənclərin möhtəşəm oyun sərgiləyərək finala kimi yüksəlmələri 22 il öncə “US Open”də “gənclər finalı”nı yenidən yada salıb. 1999-cu ildə ABŞ-da yerli tennisçi Serena Vilyamsla isevçrəli raketka ustası Martina Hingis arasında baş tutan final qarşılaşmasında Serenanın 18, Martinanın isə 19 yaşı olub. Birlikdə 28 “Böyük Dəbilqə” turnirində çempion olan bu iki tennisçidən S.Vilyams 23, M.Hingis isə 5 dəfə qalib adına yiyələnib.

Qeyd edək ki, Leyla Fernandez – Emma Radukanu arasında oynanılacaq final matçı 12 sentyabr saat 00:00-da başlayacaq.