Avqustun 16-da Rumıniyanın Yassa şəhərində şahmat üzrə qadınlar arasında Avropa çempionatının yeddinci turunun oyunları keçiriləcək.

Gazette.az xəbər verir ki, 10 qadın şahmatçımızın iştirak etdiyi qitə birinciliyində hazırda liderlər qrupunda yer alan Günay Məmmədzadə rusiyalı Aleksandra Maltsevskaya ilə mübarizə aparacaq. Son ölkə çempionu Gülnar Məmmədova belaruslu Olqa Badelka, Xanım Balacayeva Anastasiya Bodnaruk (Rusiya), Ülviyyə Fətəliyeva polşalı Klaudia Kulon, Gövhər Beydullayeva rusiyalı Semyonova, Zeynəb Məmmədyarova belaruslu Yana Ilyuçuk, Türkan Məmmədyarova ukraynalı İrina Petrova, Nəsrin Babayeva rumıniyalı Mihaela Sandu, Xəyalə Abdulla estoniyalı Triin Narva, Ayan Allahverdiyeva Rumıniyanın digər təmsilçisi Obada Ema ilə qarşılaşacaqlar.

Qeyd edək ki, avqustun 21-dək davam edəcək AÇ-də 6 turdan sonra G.Məmmədzadə 5, G.Məmmədova, X.Balacayeva 4, G.Beydullayeva, Ü.Fətəliyeva 3,5, Zeynəb Məmmədyarova, N.Babayeva 3, X.Abdulla, T.Məmmədyarova 2,5, A.Allahverdiyeva 2 xal toplayıblar.