Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən SƏTƏM (sağlamlıq, əməyin təhlükəsizliyi və ətraf mühitin mühafizəsi) mütəxəssisləri üçün təşkil olunan təlim proqramı uğurla başa çatıb.

Proqram çərçivəsində 20 müəssisənin SƏTƏM üzrə məsul əməkdaşları əməyin mühafizəsi və təhlükəsizlik mədəniyyətinin gücləndirilməsinə dair təlimlərdə iştirak ediblər. Təlimləri müvəffəqiyyətlə tamamlayan iştirakçılara sertifikatlar təqdim olunub.

Tədbirdə çıxış edən təşkilat nümayəndələri müəssisələrdə təhlükəsiz və sağlam iş mühitinin təmin edilməsinin prioritet istiqamət olduğunu vurğulayaraq, əməyin mühafizəsi sahəsində davamlı maarifləndirmənin əhəmiyyətini xüsusi qeyd ediblər.

Təlim müddətində iştirakçılar müasir iş təhlükəsizliyi standartları, fərdi mühafizə vasitələrindən düzgün istifadə, fövqəladə hallar zamanı davranış qaydaları, eləcə də istehsalatda bədbəxt hadisələrin təhqiqi və uçota alınması prosedurları barədə ətraflı məlumatlandırılıb. Sessiyalarda hadisələrin kök səbəblərinin analizi, profilaktik tədbirlərin planlaşdırılması və təhlükəsizlik üzrə idarəetmə mexanizmlərinin təkmilləşdirilməsi də diqqət mərkəzində olub.

Təlim proqramının məqsədi müəssisələrdə əməyin mühafizəsi sistemlərinin gücləndirilməsi, işçilərin həyat və sağlamlığının etibarlı şəkildə qorunması və təhlükəsizlik proseslərinin beynəlxalq və yerli tələblərə uyğun təkmilləşdirilməsi olub.