Təhlükə altında olanlara dəstək vermək, onların hüquqlarını qorumaq və hər kəsin təhlükəsiz cəmiyyətin üzvü olmasına əmin olmaq əsas məqsədlərimizdəndir.

Bu sözləri Ailə, Qadın və Uşaq Problemləri üzrə Dövlət Komitəsinin sədri Bahar Muradova "Cəmiyyətin inkişafı hamı üçün təhlükəsizlikdən başlayır” mövzusunda keçirilən konfransda söyləyib.

O bildirib ki, 2024-cü il üzrə dəstək xidmətlərinə daxil olan müraciətlərin ümumi sayı 1623 təşkil edib: “Əvvəlki dövrlərlə müqayisədə müraciətlərin sayında müəyyən fərq müşahidə olunsa da, bu artım cəmiyyətin dövlət qurumlarına və müvafiq xidmətlərə olan inamının yüksəlməsindən xəbər verir”.

"Demoqrafik göstəricilər isə müəyyən narahatlıq doğurur. Rəsmi statistikaya əsasən, doğulan uşaqlar arasında cins nisbəti hələ də balanslı deyil və 100 qıza qarşı 113 oğlan göstəricisi qalmaqdadır. Bu nisbəti aradan qaldırmaq hələlik mümkün olmasa da, hesab edirəm ki, bu istiqamətdə məqsədyönlü tədbirlərin görülməsi zəruridir", - deyə B.Muradova vurğulayıb.