Azərbaycan Tibb Universitetində (ATU) peşəkar inkişaf və beynəlxalq təcrübənin artırılması istiqamətində aparılan işlər davam etdirilir və bu istiqamətdə növbəti uğura imza atılıb. Belə ki, ATU-nun İnnovasiya və Keyfiyyətin İdarəedilməsi Ofisinin rəhbəri, dosent Aygün Babayeva dünyanın nüfuzlu beynəlxalq qurumları tərəfindən təqdim olunan, müasir səhiyyə, təhsil, rəqəmsal innovasiya və dayanıqlı inkişafın aktual istiqamətlərini əhatə edən dörd ixtisaslaşmış təlim proqramını uğurla başa vuraraq müvafiq beynəlxalq sertifikatlar əldə edib.

Tamamlanan proqramlar süni intellektin səhiyyədə etik və məsuliyyətli tətbiqi, teletibb, inklüziv təlimin təşkili, eləcə də iqlim dəyişiklikləri ilə mübarizə və dayanıqlı fəaliyyət kimi qlobal əhəmiyyət daşıyan mövzuları əhatə edir. İlk istiqamət olan səhiyyə üçün süni intellektin etikası və idarəedilməsi BMT-nin Millətlər Təşkilatının Təlim və Tədqiqat İnstitutu (UNITAR) tərəfindən Ümumdünya Səhiyyə Təşkilatının (WHO) Rəqəmsal Səhiyyə və İnnovasiya bölməsi ilə əməkdaşlıq çərçivəsində hazırlanıb. Proqram süni intellekt texnologiyalarının səhiyyədə məsuliyyətli tətbiqi üçün zəruri olan etik prinsipləri, insan hüquqları məsələlərini və tənzimləyici mexanizmləri əhatə edir.

Kurs çərçivəsində süni intellektin tibbi praktikada, ictimai səhiyyədə və səhiyyə sistemlərinin idarə olunmasında tətbiqinin etik və məsuliyyətli aspektlərinə xüsusi diqqət yetirilir.

Teletibb -UNITAR tərəfindən BMT-nin Əməliyyatlara Dəstək Departamentinin (DOS) Səhiyyə Xidmətlərinin İdarəedilməsi və Əməyin Mühafizəsi Bölməsi (DHMOSH) ilə tərəfdaşlıq çərçivəsində təşkil olunan proqramdır və məsafədən tibbi xidmətlərin göstərilməsi üzrə müasir yanaşmaları əhatə edir.

Təlim proqramında distant klinik iş prosesləri, sərhədlərarası səhiyyə kommunikasiyası, telediaqnostika, eləcə də müasir teletibb platformaları üçün informasiya texnologiyaları və məlumat təhlükəsizliyi standartları öyrənilir.

İnklüziv təlimin dizaynı üzrə proqram isə UNITAR tərəfindən təqdim olunur və BMT-nin Əlilliyi olan şəxslərin inklüzivliyi üzrə Strategiyasına əsaslanır.

Kurs iştirakçılarına əlçatanlıq, gender və güc münasibətləri ilə bağlı mövcud maneələrin aradan qaldırılması, eləcə də təhsilin bütün mərhələlərində bərabər və inklüziv öyrənmə mühitlərinin və kurikulumların hazırlanması üçün praktiki alətlər təqdim olunur.

Sonuncu proqram - İqlim naminə idman BMT-nin İqlim Dəyişikliyi üzrə Təlim Tərəfdaşlığı (UN CC:Learn) və UNITAR tərəfindən təşkil olunub. Proqram ətraf mühitin dayanıqlılığı və ictimai sağlamlığın təşviqinə yönəlib.

Təlim çərçivəsində emissiyaların azaldılması, iqlim dəyişikliklərinə uyğunlaşma və dayanıqlı fəaliyyət planlarının hazırlanması üzrə strategiyalar təqdim edilir. Həmçinin institusional fəaliyyətlərin qlobal iqlim dayanıqlılığının gücləndirilməsinə necə töhfə verə biləcəyi vurğulanır.

Universitet əməkdaşının müvafiq istiqamətlər üzrə yeni bilik və bacarıqlar əldə etməsi Azərbaycan Tibb Universitetində müasir və innovativ tibbi təhsilin inkişafına, eləcə də daha inklüziv və keyfiyyətli səhiyyə xidmətlərinin formalaşdırılmasına töhfə verir.

Bu beynəlxalq sertifikatların əldə olunması həmçinin universitet əməkdaşlarının davamlı peşəkar inkişafının, qlobal təcrübənin öyrənilməsinin və müasir çağırışlara uyğun biliklərin institusional fəaliyyətə inteqrasiyasının əhəmiyyətini bir daha nümayiş etdirir.