Müasir jurnalistikanın bütün sahələrində, o cümlədən rəqəmsal medianın ən yeni trendlərini özündə əks etdirən televiziya yayımında datalar əhəmiyyətli yer tutur. TV jurnalistləri hazırladıqları verilişlərin forma və məqsədindən asılı olaraq datalardan müxtəlif şəkildə istifadə edirlər. Belə yaradıcılıq prosesində jurnalist həm kiçik ekranın özəlliklərini bilməli, həm də data ilə işləməyi bacarmalıdır. Bakı Dövlət Universitetinin “Nəşr Evi”ndə çap olunmuş “Telejurnalistika və data analiz” adlı dərs vəsaiti gələcək jurnalistlərə məhz bu bilik və bacarıqları təlqin etmək nəqsədilə yazılıb.

Kitabın müəllifi, BDU-nun Multimedia və elektron kommunikasiya kafedrasının müəllimi, filologiya üzrə fəlsəfə doktoru Arzu İsayeva AZƏRTAC-a bildirib ki, müasir tədris ehtiyaclarına uyğun olaraq yazılmış dərs vəsaiti daim yenilənən televiziya jurnalistikasında, ümumən jurnalistika və multimedia yaradıcılığında aparıcı mövqe tutan data analizinin aktual məsələlərini özündə əks etdirir.

Mövcud yayım praktikasının tələblərinə uyğun olaraq dərs vəsaitində data analiz televiziyanın məlumat mənbəyi və jurnalist-reportyor işinin vacib istiqaməti kimi nəzərdən keçirilir. Datanın mahiyyəti, verilənlər bazası kimi televerilişlərdə istifadəsi, xəbər istehsalı üçün önəmi, əldə edilib işlənməsi, vizuallaşdırılması, hekayə halına salınıb auditoriyaya çatdırılması kimi yaradıcılıq mərhələləri ön plana çəkilib.

Ali məktəblərin jurnalistika fakültələrinin tələbələri və multimedia sahəsində çalışan jurnalistlər üçün nəzərdə tutulmuş dərs vəsaitinin elmi redaktoru dosent Sevinc Məmmədova, rəyçiləri isə professor Qulu Məhərrəmli və yeni media üzrə mütəxəssis Anzulə Cəfərovadır. Vəsait kütləvi tirajla nəşr edilib.