İyulun 4-5-də Nursultan şəhərində Qazaxıstan və Azərbaycan arasında ticarət-iqtisadi əməkdaşlıq üzrə birgə Hökumətlərarası Komissiyanın iclasının keçirilməsi planlaşdırılır.

Gazette.az xəbər verir ki, bunu Qazaxıstanın Azərbaycandakı səfiri Serjan Abdıkarimov bildirib.

O əlavə edib ki, iclasda ölkələr arasında müxtəlif sahələr üzrə əməkdaşlıq məsələləri nəzərdən keçiriləcək.

“Bu il Azərbaycan və Qazaxıstan arasında diplomatik münasibətlərin 30-cu ildönümünü qeyd edirik. Hazırda 2026-cı ilədək əməkdaşlığın inkişafı üzrə kompleks proqram hazırlanır. Pandemiyaya baxmayaraq, Azərbaycan və Qazaxıstan arasında əmtəə dövriyyəsi artır, avireyslər, onlarla yanaşı isə işgüzar və insanlar arasında əlaqələr bərpa olunub”, - o deyib.

Səfir Qazaxıstan-Azərbaycan İşgüzar Şurasının yaradılacağını vurğulayıb: “Qazaxıstan öz tərəfindən işləri artıq tamamlayıb. Bu platforma ölkələrin biznes dairələri arasında müntəzəm dialoqa, iqtisadi-ticarət və investisiya əməkdaşlığının möhkəmləndirilməsinə xidmət edəcək”.