Futbol üzrə dünya çempionatının seçmə mərhələsi çərçivəsində gələn ay keçiriləcək Azərbaycan – Portuqaliya oyununun biletləri avqustun 21-dən satışa çıxarılacaq.

AFFA-dan GAZETTE-yə verilən məlumata görə, “COVID-19” pandemiyası ilə əlaqədar qarşılaşmaya stadionun azarkeş tutumunun 50 faizi qədər azarkeş buraxılacaq.

Azərbaycan – Portuqaliya oyununa biletləri “iticket” mobil tətbiqi, veb-saytı və ya “Gənclik Mall”, “28 Mall”da yerləşən iticket bilet satış məntəqələrindən əldə etmək olar.

Pandemiya ilə əlaqədar təması minimuma endirmək məqsədilə biletlər elektron formada təqdim ediləcək. Mobil tətbiq və ya veb-saytdan elektron bilet əldə etdikdə, həmin bilet alıcının e-mail ünvanına göndərilir və ya şəxsi kabinetində görünür.
Bilet satış məntəqəsindən bilet əldə etdikdə, elektron bilet alıcının e-mail ünvanına göndərilir, ehtiyac olarsa, A4 formatında çap edilib təqdim olunur. Oyun günü stadiona daxil olmaq üçün elektron bileti telefondan oxutmaq və ya A4 formatında çap edilmiş bileti təqdim etmək olar.

Biletlərin qiymətləri kateqoriyalara uyğun olaraq 2, 5, 10 və 15 manatdır.

Azarkeşlər stadiona “COVID-19”-la bağlı sanitar-gigiyenik proseduralara riayət olunması şərti ilə buraxılacaq.

Qeyd edək ki, Azərbaycan – Portuqaliya matçı sentyabrın 7-də saat 20:00-da Bakı Olimpiya Stadionunda keçiriləcək.