ABŞ-ın şahmat paytaxtı Sent-Luis şəhərində “Grand Chess Tour” şahmat seriyasının beşinci mərhələsi olan “Sinquefield Cup”da 3-cü turun görüşləri keçirilib.

GAZETTE xəbər verir ki, turnirdə iştirak edən qrosmeysterimiz Şəhriyar Məmmədyarov 2 heç-heçənin ardından bu turda qələbə qazanmağa müvəffəq olub. Macarıstanlı Riçard Lapporta qarşı ağ fiqurlarla oynayan şahmatçımız rəqibini məğlub etməyi bacarıb. 

Hazırda aktivində 2 xal olan qrosmeysterimiz turnirdə 4-5-ci yerləri bölüşür. Növbəti turda Ş.Məmmədyarovun rəqibi yerli şahmatçı Samuel Şankland olacaq.

Qeyd edək ki, klassik şahmat üzrə keçirilən yarışda ümumilikdə 10 qrosmeyster – ABŞ təmsilçiləri Uesli So, Ceffri Şonq, Fabiano Karuana, Samuel Şankland, Dariuş Sverş, Lenyer Dominqes, fransalı Maksim Vaşe-Laqrav, rusiyalı Petr Svidler və macarıstanlı Riçard Rapport iştirak edir.

Turnirin mükafat fondu 325 min dollardır. Onun 90 min dollarını qalib qazanacaq.

Xatırladaq ki, Ş.Məmmədyarov seriyanın birinci mərhələsi “Superbet Chess Classic Romania”ın qalibi olub.