Türkiyədə bir neçə gündür tüğyan edən meşə yanğınlarının qarşısını almaq hələ ki, mümkün olmayıb.

Gazette.az xəbər verir ki, ölkənin kənd təsərrüfatı və meşə naziri Bekir Pakdemirli hazırda 7 bölgənin 21 nöqtəsində meşə yanğınlarının davam etdiyini bildirib.

Türkiyənin müxtəlif bölgələrində eyni anda baş verən meşə yanğınları bir çox sahələr, o cümlədən turistik ərazilər üçün də ciddi təhlükələr yaradıb.

Yanğınlar zamanı indiyədək yüzə yaxın binaya ciddi zərər dəydiyi təsbit edilib. Kənd təsərrüfatına və heyvandarlığa killi miqdarda zərər dəyib. Yanğın nəticəsində evsiz qalan sakinlərin gecələməsinin təmin edilməsi üçün tədbirlərə başlanılıb. Təxliyə olunan otel sakinlərinin hərəkət istiqamətləri istəklərinə uyğun həyata keçirilir.

Yanğınlar səbəbindən ölənlərin sayı dördə çatıb.

Adana, Kütahya, Kilis və Muğlanın Köyceğiz rayonunda baş verən yanğının artıq qismən söndürüldüyü bildirilir.

Hüquq-mühafizə orqanları yanğınların başvermə səbəbi ilə bağlı çoxistiqamətli araşdırmaya başlayıb. Türkiyənin Manisa vilayətinin Turgutlu rayonunda meşə yanğını törətməkdə şübhəli bilinən PKK üzvləri şübhəli qısmində saxlanılıblar.