Sentyabrın 8-də start götürən ikinci onlayn Şahmat Olimpiadasının qalibi Rusiya yığması olub.

Olimpiadaya top divizionundan qoşulan Rusiya C qrupunda keçirdiyi bütün görüşlərdə qalib gələrək pley-off mərhələsinə yüksəlib. Bu mərhələdə Azərbaycan yığmasının da mübarizə apardığı B qrupundan qrup ikincisi kimi 1/4 finala yüksəlmiş Macarıstan komandası ilə qarşılaşan Rusiya hər iki görüşdə rəqibindən üstün olub, 2-0 (3.5-2.5, 3.5-2.5).

Yarımfinal mərhələsində qarşılaşdığı Çin yığmasını 2-0 (3.5-2.5, 4-2) hesablı nəticə ilə keçən Rusiya millisi finalda oynamaq hüququ əldə edib.

Həlledici görüşdə Rusiya yığmasının rəqibi Hindistanı tay-breykdə məğlub edən ABŞ komandası olub. İki gün davam edən final matçında ABŞ-ı hər iki görüşdə eyni hesabla (3.5-2.5, 3.5-2.5) məğlub edən Rusiya ikinci dəfə onlayn formatda keçirilən Şahmat Olimpiadasının qalibi olub.