BAKU Azərbaycan
15.03 °C

“US Open”də finalın adı: Novak Cokoviç – Daniil Medvedev

İlin Böyük Dəbilqə seriyalı son tennis turniri “US Open”də finala yüksələn raketka ustaları müəyyənləşib.

GAZETTE xəbər verir ki, turnirin ilk yarımfinal qarşılaşması Rusiya təmsilçisi Daniil Medvedev ilə kanadalı Felix Oje-Aliassim arasında keçirilib.

İlk setdə rəqibinə 6-4 hesabı ilə qəlib gələn Daniil ikinci setdə gənc rəqibinin müqaviməti ilə üzləşsə də son anda “breyk-poyntlar” sayəsində raundu öz hesabına başa vura bilib. Sürpriz şəkildə “US Open”də yarımfinala kimi irəliməməyi bacaran Felix Oje nə qədər çalışsa da Medvedevin qalibiyyətinə maneə ola bilməyib. Üçüncü setdən də 6-2 hesablı qalibiyyətlə ayrılan Daniil fərdi yarışlarda rusiyalı kişi tennisçilər arasında “US Open”də finala vəsiqə əldə edən ilk isim olub.

Yarımfinal mərhələsinin daha maraqla gözlənilən ikinci qarşılaşmasında ATP reytinqinin nömrə 1 tennisçisi Novak Cokoviçlə (Serbiya) “Tokio-2020” Yay Olimpiya Oyunlarında ona qalib gələn Aleksandr Zverev (Almaniya) üz-üzə gəliblər.

İlk seti Zverev 4-6 hesabı ilə öz xeyrinə başa vursa da ardıcıl 2 setdə Novak rəqibindən üstün olub, 6-2; 6-4. Dördüncü setdə Aleksandr Zverev özündə güc taparaq hesabı bərabərləşdirməyə (4-6) nail olsa da, həlledici setdə Cokoviç daha dəqiq olub, 6-2.

Beləliklə, 5 set oynanılan və 3 saat 38 dəqiqə davam edən gərgin matçdan 3-2 hesabı ilə qalib ayrılan Cokoviç 9-cu dəfə “US Open”də finala yüksəlməyi bacarıb. Eyni zamanda “Grand Slam” turnirlərində 31-ci dəfə final qarşılaşmasına çıxacaq olan 34 yaşlı Cokoviş isveçrəli Rocer Federerin rekorduna da şərik olub.