“Champions Chess Tour” onlayn seriyasının sonuncu mərhələsi – “Aimchess US Rapid” turnirinin təsnifat mərhələsinin son 5 turunun oyunları keçirilib.

GAZETTE xəbər verir ki, turnirdə iştirak edən qrosmeysterimiz Şəhriyar Məmmədyarov üçüncü oyun gününün ilk qarşılaşmasında – 11-ci turda hindistanlı Santoş Viditlə heç-heçə edib, növbəti turda vyetnamlı Le Quanq Liemə uduzub. 13-cü turda Fransa təmsilçisi Alireza Firuzca ilə bərabərə qalan şahmatçımız sonrakı turda rusiyalı Daniel Naroditskiyə qalib gəlib. Şəhriyarın ABŞ təmsilçisi Erik Hənsenlə keçirdiyi son qarşılaşmasında da heç-heçə qeydə alınıb.

15 turdan sonra 9 xal toplayan qrosmeysterimiz yekunda 6-cı yeri tutaraq turnirin 1/4 final mərhələsinə vəsiqə qazanıb.

Bu mərhələdə Şəhriyar Məmmədyarovun rəqibi Ermənistan təmsilçisi Levon Aronyan olacaq. Rəqiblər iki oyun günündə, hər gün 4 oyun olmaqla, növbəti mərhələyə yüksəlmək üçün mübarizə aparacaqlar.

1/4 final mərhələsinin digər oyunlarında Vladislav Artemiev Leyner Domiqeslə, Maqnus Karlsen Yan-Kriştov Duda ilə, Alireza Firuzca isə Vesli So ilə üz-üzə gələcək.

Qeyd edək ki, mükafat fondu 100 min ABŞ dolları olan turnir sentyabrın 5-dək davam edəcək.