ABŞ-ın şahmat paytaxtı Sent-Luis şəhərində “Grand Chess Tour” şahmat seriyasının beşinci mərhələsi olan “Sinquefield Cup”da 5-ci turun görüşləri keçirilib.

GAZETTE xəbər verir ki, turnirdə iştirak edən qrosmeysterimiz Şəhriyar Məmmədyarov bu turda yerli şahmatçı Lenyer Dominqeslə üz-üzə gəlib və görüş heç-heçə başa çatıb.  

Geridə qalan 5 turdan sonra aktivində 2,5 xal (1 qələbə, 3 heç-heçə, 1 məğlubiyyət) olan qrosmeysterimiz 10 şahmatçının iştirak etdiyi turnirdə 5-7-ci yerləri bölüşür. Növbəti turda Ş.Məmmədyarovun rəqibi daha bir yerli şahmatçı Dariuş Sverş olacaq.

Qeyd edək ki, klassik şahmat üzrə keçirilən yarışda ümumilikdə 10 qrossmeyster – ABŞ təmsilçiləri Uesli So, Ceffri Şonq, Fabiano Karuana, Samuel Şankland, Dariuş Sverş, Lenyer Dominqes, fransalı Maksim Vaşe-Laqrav, rusiyalı Petr Svidler və macarıstanlı Riçard Rapport iştirak edir.

Turnirin mükafat fondu 325 min dollardır. Onun 90 min dollarını qalib qazanacaq.

Xatırladaq ki, Ş.Məmmədyarov seriyanın birinci mərhələsi “Superbet Chess Classic Romania”ın qalibi olub.