Rumıniyanın Yassa şəhərində keçirilən qadın şahmatçıların fərdi Avropa çempionatına yekun vurulub.

GAZETTE xəbər verir ki, 10 qadın şahmatçımızın iştirak etdiyi qitə birinciliyində təmsilçilərimiz arasında ən yüksək nəticəni Gülnar Məmmədova əldə edib. Son ölkə çempionu keçirdiyi 11 matçda 7,5 xal (6 qələbə, 3 heç-heçə, 2 məğlubiyyət) əldə edərək qitə çempionatını 6-cı pillədə başa vurub və qadınlararası Dünya kubokunda iştirak etmək hüququna sahib olub. 

Çempionatda iştirak edən digər qadın zəka sahiblərimizdən Günay Məmmədzadə turniri 15, Xanım Balacayeva 28, Gövhər Beydullayeva 41, Türkan Məmmədyarova 52, Ülviyyə Fətəliyeva 53, Zeynəb Məmmədyarova 58, Xəyalə Abdulla 68, Ayan Allahverdiyeva 86, Nəsrin Babayeva isə 92-ci pillədə başa vurub.

Qeyd edək ki, 117 qadın şahmatçının iştirak etdiyi Avropa çempionatının qalibi 9 xala (7 qələbə, 4 heç-heçə) ermənistanlı Elina Danielyan olub. Çempionatın gümüş medalına 8,5 xalla (6 qələbə, 5 heç-heçə) Ukrayna təmsilçisi Yuliya Osmak, bürünc medalına isə 8 xalla (7 qələbə, 2 heç-heçə, 2 məğlubiyyət) polşalı Oliviya Kiolbasa yiyələnib.