Avqustun 10-da Azərbaycan Cüdo Federasiyasında vitse-prezident Sadıq Sadıqovun rəhbərliyi altında iclas keçirilib.

Federasiyadan Gazette.az-a verilən məlumata görə, iclasda cüdo üzrə kişilərdən ibarət milli komandaya yeni təyinatlar olub.

Belə ki, Pekin Olimpiadasının və açıq dünya çempionatının bürünc mükafatçısı Mövlud Mirəliyev cüdo millimizin baş məşqçisi, Elçin İsmayılov, Elxan Rəcəbli, Şümşad Bəhramov, İlham Məmmədov və Zaur Babayev isə onun köməkçiləri təyin olunub.

Yeni alınan qərara əsasən, bundan sonra böyüklər və gənclərdən ibarət komandalar birlikdə məşq edəcəklər və məşqçilər heyəti hər iki komandaya nəzarəti həyata keçirəcəklər.

Qeyd edək ki, avqustun 2-də Tokio Olimpiadasındakı uğursuz çıxışı əsas götürülərək millimizin məşqçilər heyəti bütünlüklə istefaya göndərilmişdi. 

Xatırladaq ki, ukraynalı baş məşqçi Ruslan Maşurenkonun rəhbərliyi altında “Tokio-2020”-də 9 cüdoçu ilə təmsil olunan komandamız yalnız İrina Kindzerskanın sayəsində yalnız 1 bürünc medal qazanmağa müvəffəq olmuşdu.