Bu gün Azərbaycan Tibb Universitetinin (ATU) rektoru professor Gəray Gəraybəyli Azərbaycanın Milli Qəhrəman, şəhid general-mayor Polad Həşimovun qızı Aybəniz Həşimovanı və həyat yoldaşı Ofelya Salmanova ilə görüşüb.

Universitetin mətbuat xidmətindən bildiriblər ki, Tibb Universitetinin böyük ailəsinə qatılması münasibətilə A.Həşimovanı təbrik edən rektor ildönümünü yaşadığımız Vətən müharibəsinə toxunub. Bildirib ki, general-mayor Polad Həşimov da daxil olmaqla bütün şəhidlərimizin, ordumuzun sayəsində biz rayonlarımızın işğal günlərini deyil, azadolunma tarixlərini böyük qürurla qeyd edirik: “Bu tarixi Qələbə Azərbaycan xalqına tamam başqa bir ruh, başucalığı gətirdi. Ali Baş Komandanın müdrikliyi, əsgərdən generala kimi bütün hərbçilərimizin qəhrəmanlığı və Azərbaycan xalqının yumruq kimi birləşməsi nəticəsində biz çox gözlədiyimiz qələbəni əldə etdik və 30 il davam edən ədalətsizliyi aradan qaldırdıq”.

Hər bir insan üçün valideyn itkisinin çox ağır olduğunu söyləyən Gəray Gəraybəyli əlavə edib ki, əgər Polad Həşimov şəhid olana kimi Aybəniz tək onun qızı idisə, ondan sonra artıq bütün Azərbaycanın övladıdır.

Sonra rektor Tibb Universiteti, onun tarixi haqda məlumat verib, generalımızın qızının ən azı 6 il ATU ailəsinin üzvü olacağından məmnunluğunu ifadə edib.

Aybəniz Həşimovaya təhsildə uğurlar arzulayan ATU-nun rektoru ona tələbə biletini və universitet adından hədiyyə olaraq noutbuk təqdim edib.

Onu da bildirilib ki, universitetin Elmi Şurasının qərarı ilə A.Həşimovaya əlavə olaraq 200 manat məbləğində təqaüd ayrılıb.