Bakı Baş Səhiyyə Mərkəzində “Təməl Həyat Dəstəyi” mövzusunda təlimlər keçirilib. Təlimlərə Mərkəzin tabeliyində olan bütün tibb müəssisələrinin Təcili yardım üzrə məsul şəxsləri cəlb edilib. BBSM-in İnsan resursları və hüquq departamentinin Təlim və inkişaf şöbəsinin müdiri Nərgiz Bağırova tərəfindən keçirilən təlimlərdə 47 tibb müəssisəsi üzrə 90-dan çox əməkdaş iştirak edib.

Təlimin əvvəlində iştirakçılara pre-testlər təqdim olunub. Təlim həm nəzəri, həm də praktiki formada beynəlxalq protokollara uyğun olaraq keçirilib. Təlim iştirakçıları CRP (kardiopulmonal reanimasiya), hava yollarının açılması kimi həyat üçün təhlükəli vəziyyətlərin müəyyənləşdirilməsi və daha təkmil tibbi yardım briqadası gələnədək həyati vacib ilkin tibbi yardım tədbirlərinin görülməsinə dair bilik və bacarıqlara yiyələniblər.

Təlimlərin sonunda təlim iştirakçılarının mənimsənilən bilik və bacarıqları test üsulu ilə qiymətləndirilib.

“Təməl Həyat Dəstəyi” mövzusunda keçirilən təlimlərə BBSM-in bütün tibb müəssisələrinin əməkdaşlarının cəlb olunacağı nəzərdə tutulub.