“Korrupsiya ilə əlaqədar hüquqpozmalarla bağlı məlumat verən şəxslərin həvəsləndirilməsi və müdafiəsi haqqında qanunda beynəlxalq praktikadan fərqli olaraq cinayətin iştirakçısı olmuş şəxslər tərəfindən bu korrupsiya cinayəti barədə məlumat verilməsi ilə bağlı məsələnin həlli tənzimlənmir.

Bunu deputat Qüdrət Həsənquliyev Milli Məclisdə “Korrupsiya ilə əlaqədar hüquqpozmalarla bağlı məlumat verən şəxslərin həvəsləndirilməsi və müdafiəsi haqqında” qanun layihəsininin müzakirəsi zamanı deyib.

Deputat beynəlxalq praktikanın araşdırılmasına da diqqət çəkib: “Məsələn, ABŞ-də cinayətin iştirakçısı olmuş şəxs korrupsiya cinayəti haqqında məlumat verirsə, o halda həmin şəxsin həm müdafiəsi, həm də onun mükafatlandırılması məsələsi necə həll olunur? Yaxud şəxs hansı şərtlər altında korrupsiya cinayətləri haqqında məlumat verir? Bu məsələlərə də baxılmalıdır”.

Deputat onu da qeyd edib ki, ifşa olunmaq təhlükəsini hiss eləyib bu barədə məlumat verən şəxsin mükafatlandırılması fərqli olmalıdır. “Yəni korrupsiya faktı ilə bağlı hansı müddətdən sonra bu barədə məlumat verir. Bu, çox önəmli faktdır. Bunların hamısı həvəsləndirmə zamanı nəzərə alınmalıdır”, - o qeyd edib.

Deputat əlavə edib ki, məlumatı verən şəxs əgər öldürülərsə, bizdə cəmi 20 min manat kompensasiya ödənilməsi nəzərdə tutulur, lakin bu olduqca kiçik bir rəqəmdir: “Hesab edirəm ki, bu rəqəmi indiki şərait daxilində 150 min manat məbləğində nəzərdə tutulmalıdır.

Bir də ABŞ-də əgər şəxs hər hansı iri korrupsiya cinayətləri haqqında məlumat verirsə və o vəsait dövlətə qaytarılırsa, qaytarılan vəsaitin 10%-dən 30%-nə qədəri ödənilir. Amma bizdə bu 5% nəzərdə tutulur, hesab edirəm ki, bu da nəzərə alınmalıdır”. (Olke.az)