Ayşə Allahverdiyevanın startap təsisçisi kimi qarşılaşdığı ən ciddi çətinliklərdən biri süni intellekti sadəcə trender üçün deyil, məqsədli və təhlükəsiz tətbiq etmək olub. Məlumatların doğruluğunu qorumaq üçün modelin nə vaxt cavab verməyib sualı birbaşa həkimə yönləndirməli olduğu dəqiq müəyyənləşdirilib. İnkişaf prosesində istifadəçilərin ehtiyac duymadığı funksiyaya həftələrlə vaxt sərf edilməsi isə komanda üçün mühüm təcrübə dərsinə çevrilib.
 
Beynəlxalq startap mühitində gənc azərbaycanlı qadın kimi fəaliyyət göstərən Ayşənın uğurunda ailəsinin ona aşıladığı inam və təhsil prioritetləri böyük rol oynayır. Qadınların texnologiya sahəsində az təmsil olunduğunu bildirən mütəxəssis üçün əsas prinsip görülən işin keyfiyyətidir. Sıfırdan yaratdığı funksional məhsul və nüfuzlu mərkəzlərdəki tədqiqat təcrübəsi diqqəti kimliyindən daha çox ortaya qoyduğu real nəticələrə yönəldir.