Nigeriyanın şimal-şərq hissəsində yerləşən Borno ştatında yayılan vəba epidemiyası səbəbindən azı 198 nəfər həyatını itirib. Bununla yanaşı, infeksiyaya yoluxanların ümumi sayı 35 min 500 nəfəri ötüb.

Bu barədə "Premium Times" nəşri yerli hakimiyyət orqanlarının və "Sərhədsiz Həkimlər" (MSF) beynəlxalq tibbi təşkilatının rəsmi məlumatlarına əsaslanaraq məlumat yayıb.

May ayının başlanğıcında qeydə alınan epidemiya çərçivəsində MSF iyulun 12-dək vəbaya şübhəli bilinən 24 mindən artıq xəstəyə tibbi xidmət göstərib. Həmin şəxslərin 25 faizindən çoxu xəstəxanaya ağır vəziyyətdə gətirilib. İnfeksiyanın qarşısını almaq məqsədilə təşkilat hazırda 17 oral rehidrasiya məntəqəsi, 5 müalicə şöbəsi və 2 ixtisaslaşmış mərkəzin fəaliyyətinə dəstək verir.

"Sərhədsiz Həkimlər" təşkilatından bildirilib ki, xəstəliyin yayılma sürəti həyata keçirilən qabaqlayıcı tədbirləri üstələməkdə davam edir. Vəziyyətin bu cür kəskinləşməsinə əsas səbəb kimi keyfiyyətli içməli suyun olmaması, qeyri-qənaətbəxş sanitariya şəraiti və insanların tibbi xidmətlərə çıxışının məhdudluğu vurğulanır.

Xatırladaq ki, iyunun ortalarında BMT-nin Humanitar Məsələlərin Əlaqələndirilməsi İdarəsi Borno ştatı üzrə 12 mindən çox yoluxma və 90 ölüm halı barədə hesabat vermişdi. İyul ayının əvvəllərində isə yerli hökumət MSF-in yaxından iştirakı ilə 2 milyon 600 mindən artıq insanı əhatə edən kütləvi vəba peyvəndi kampaniyasını icra edib.(oxu.az)