Həkimlər bu suala birmənalı cavab vermir. Çünki hər iki çay eyni bitkidən – “Camellia sinensis” yarpaqlarından hazırlanır və hər ikisinin sağlamlıq üçün faydaları var. Fərq isə emal üsulu, antioksidant tərkibi və kofein miqdarındadır.

Yaşıl çay daha az emal olunduğu üçün tərkibində güclü antioksidantlardan hesab edilən katexinlər və EGCG daha çox saxlanılır. Araşdırmalar göstərir ki, bu maddələr hüceyrələri sərbəst radikalların təsirindən qorumağa, ürək-damar sağlamlığını dəstəkləməyə və maddələr mübadiləsinə müsbət təsir göstərməyə kömək edə bilər. 

Qara çay isə fermentasiya olunduğundan tərkibində teaflavinlər adlı antioksidantlar üstünlük təşkil edir. Bu maddələrin ürək sağlamlığını dəstəklədiyi, iltihabı azaltdığı və orqanizmi oksidləşdirici stresdən qoruduğu bildirilir. 

Bəs yay aylarında hansı daha uyğundur?

Mütəxəssislər bildirirlər ki, şəkərsiz hazırlanmış həm yaşıl, həm də qara çay orqanizmin maye balansına töhfə verir və susuzlaşdırmır. Əksinə, kifayət qədər su ilə birlikdə qəbul edildikdə yay aylarında yaxşı seçim hesab olunur. 

İsti havalarda daha yüngül dadı və nisbətən az kofeini səbəbindən yaşıl çaya üstünlük verənlərin sayı çoxdur. Lakin səhərlər enerjiyə ehtiyac duyan və daha tünd dad sevən insanlar üçün qara çay da uyğun seçim ola bilər. Əsas şərt çayı çox şəkərsiz içmək və gün ərzində kifayət qədər su qəbul etməkdir. 

Həkimlər gündə 2-3 fincan şəkərsiz çayın əksər sağlam insanlar üçün təhlükəsiz olduğunu bildirirlər. Hipertoniya, ürək ritm pozğunluğu, hamiləlik və ya kofeinə həssaslıq kimi hallarda isə çay miqdarı fərdi olaraq həkimlə məsləhətləşdirilməlidir. 

Yay mövsümündə “ən sağlam çay” anlayışı yoxdur. Yaşıl çay antioksidant baxımından üstün sayılsa da, qara çay da sağlamlıq üçün faydalıdır. Ən yaxşı seçim şəkərsiz, normada qəbul edilən və bol su ilə tamamlanan çaydır.(axsam.az)