Azərbaycan Dövlət Neft və Sənaye Universitetində (ADNSU) İnsan Resursları Departamentinin nəzdində fəaliyyət göstərən AZİ Akademiyanın və “Referans Medical Group”un birgə təşkilatçılığı ilə “İlkin tibbi yardım” mövzusunda təlim keçirilib.

Təlim “Referans Medical Group”un peşəkar əməkdaşları tərəfindən aparılıb və iştirakçılara təcili hallar zamanı davranış qaydaları, həyati vacib ilkin yardım bacarıqları, süni tənəffüs və ürək masajı (CPR), boğulma zamanı müdaxilə, həmçinin qanaxma zamanı düzgün ilkin tədbirlərin görülməsi haqqında praktiki məlumatlar verilib.

Tədbirdə çıxış edən “Referans Ambulansı” layihəsinin rəhbəri Anar Seyfullayev Azərbaycanın ilk özəl Təcili Tibbi Yardım xidməti haqqında geniş məlumat verib. O bildirib ki, bu kimi maarifləndirici təlimlər cəmiyyətin təhlükəsizlik mədəniyyətinin formalaşmasında mühüm rol oynayır. 

İnteraktiv formatda keçirilən təlimdə iştirakçıları maraqlandıran ilkin təcili yardım haqqında suallar cavablandırılıb və əyani formada izah olunub.

Qeyd edək ki, təlimin əsas məqsədi iştirakçılara fövqəladə vəziyyətlərdə ilkin tibbi yardımın əhəmiyyətini çatdırmaq, onlara həyati vacib bilik və bacarıqları aşılayaraq zəruri anlarda düzgün müdaxilə etmə üsullarını öyrətmək olub.