Massaçusets Ümumi Xəstəxanasının (MGH) alimləri infarktdan sonra ürək hüceyrələrinə zərər vuran və ölümcül ritm pozğunluqlarına səbəb olan yeni bir bioloji mexanizmi müəyyən ediblər.

Gazette.az “SciTechDaily” saytına istinadla xəbər verir ki, tədqiqat nəticəsində immun sisteminin bir hissəsi olan neytrofillərin, infarktdan sonra “Resistin-bənzər molekul qamma” (RELMy) adlı zülal istehsal etdiyi məlum olub. Bu zülal ürək əzələsi hüceyrələrinin (kardiyomiyositlərin) səthində mikroskopik deşiklər açaraq onların fəaliyyətini pozur və mədəcik taxikardiyası (VT) və mədəcik fibrilasiyası (VF) kimi təhlükəli ürək ritm pozğunluqlarına səbəb olur. Bu vəziyyətlər ürəyin nizamsız və həddən artıq sürətli döyünməsi ilə müşayiət olunur, nəticədə bir neçə dəqiqə ərzində qəfil ürək dayanması və ölüm riski yaradır.

MGH-nin tədqiqatçıları Nina Kumovski və professor Matthias Nahrendorf siçan modellərində RELMy genini silməklə infarktdan sonrakı aritmiya hallarının 12 dəfə azaldığını müəyyən ediblər. Bu nəticə, RELMy zülalının ürək ritm pozğunluqlarının yaranmasında əsas rol oynadığını sübut edir.

Alimlərin fikrincə, bu tapıntı ürək xəstəliklərinin müalicəsində immun hüceyrələrinin hədəflənməsi üçün yeni imkanlar açır. Gələcəkdə RELMy zülalını bloklayan dərmanların aritmiyaları və qəfil ürək ölümünü azaltma potensialı var. Tədqiqatçılar növbəti mərhələdə bu zülalın insan orqanizmində təsir mexanizmini öyrənməyi və onu zərərsizləşdirə biləcək dərmanların hazırlanmasını planlaşdırırlar.