Bakı Şəhər Gənclər və İdman Baş İdarəsi ilə Azərbaycan Qan Donorluğunun İnkişafı Mərkəzi arasında qan donorluğu mədəniyyətinin inkişafı və təbliği istiqamətində iki tərəfli rəsmi görüş keçirilib.

Görüşdə Bakı Şəhər Gənclər və İdman Baş İdarəsinin rəisi Dəniyar Teymurlu, idarənin idman sektorunun müdiri Rəşad Əliyev, Azərbaycan Qan Donorluğunun İnkişafı Mərkəzinin idarə heyətinin sədri Fuad Rəsul, icraçı direktor Kamil Hüseynov, gənclərlə iş şöbəsinin müdiri Tural Əsgərov və sədrin müşaviri Fəxriyə Əhədova iştirak ediblər.

İşgüzar görüşdə birgə tədbirlərin təşkili, gənclərin – xüsusilə də gənc donorların idman sahəsinə cəlb edilməsi, həmçinin kütləvi idman yarışlarında donorluq mədəniyyətinin təbliği istiqamətində əməkdaşlıq imkanları müzakirə olunub.

Sonda Azərbaycan Qan Donorluğunun İnkişafı Mərkəzinin sədri Fuad Rəsul yaradılan şəraitə və göstərilən diqqətə görə Bakı Şəhər Gənclər və İdman Baş İdarəsinin rəisi Dəniyar Teymurluya təşəkkürünü bildirib. Görüş xatirə fotolarının çəkilməsi ilə yekunlaşıb.