BonAqua brendinin tərəfdaşlığı ilə 30 oktyabr - 3 noyabr tarixləri arasında Azərbaycan Könüllülərinin “Zəfər 5 il” adlı könüllülər düşərgəsi keçiriləcək.

Gazette.az xəbər verir ki, Azərbaycan Respublikasının Gənclər və İdman Nazirliyi, Coca-Cola şirkəti, Azərbaycan Respublikasının Gənclər Fondu, “Nar”ın tərəfdaşlığı və Azərbaycan Könüllü Təşkilatları İttifaqının təşkilatçılığı ilə həyata keçiriləcək növbəti layihə vətənpərvərlik mövzusuna həsr olunur.  

Göygöl Olimpiya İdman Kompleksində baş tutacaq düşərgə ölkənin müxtəlif bölgələrindən seçilmiş gəncləri bir araya gətirəcək. Proqram çərçivəsində vətənpərvərlik ruhunu gücləndirən fəaliyyətlər, komanda oyunları, seminarlar və motivasiya sessiyaları təşkil olunacaq.

Coca-Cola şirkətinin BonAqua brendi rəsmi tərəfdaş kimi  gənclərin düşərgə müddətində sağlam və aktiv şəkildə iştirakını təmin etmək məqsədilə iştirakçıların təmiz və keyfiyyətli su ilə təminatına dəstək göstərəcək.

Qeyd edək ki, BonAqua Coca-Cola şirkətinin portfelinə daxil olan və beynəlxalq keyfiyyət standartlarına uyğun istehsal edilən təbii içməli sudur. Brend illərdir Azərbaycanda həyata keçirdiyi sosial və ekoloji layihələrlə gənclərin təşəbbüskarlığını və sağlam həyat tərzini dəstəkləməyə davam edir.

Xatırladaq ki, Coca-Cola 2025-ci ildə Azərbaycanda 30 illik yubileyini qeyd edib. Şirkət Azərbaycandakı fəaliyyətinə 1994-cü ildə Türkiyənin beynəlxalq içki istehsalı şirkəti olan “Coca-Cola İçecek”in tərkib hissəsi olaraq “Azerbaijan Coca-Cola Bottlers”ın yaradılması ilə başlayıb və o vaxtdan bəri “Coca-Cola”, “Fanta”, “Sprite”, “Bonaqua”, “Cappy” və “Fuse Tea” kimi məşhur sərinləşdirici içki markalarının istehsalı və satışı ilə məşğuldur.