Yaponiya Quru Özünümüdafiə Qüvvələri və ABŞ Dəniz Piyadaları Yaponiyanın şimalındakı Hokkaydo adasında sentyabr-oktyabr aylarında iki həftə ərzində birgə təlimlər keçirəcək.

Gazette az xəbər verir ki, bu barədə “Nikkei” məlumat yayıb.

Təlimlərə 4000-dən çox hərbçi cəlb olunacaq. Təlimlərin məqsədi Rusiyanın Ukraynada hərbi əməliyyatı və Çinin hərbi güclənməsi nəzərə alınmaqla Yaponiya və ABŞ-ın Şərqi Asiyada yaranan təhlükələrə cavab vermək qabiliyyətini artırmaqdır.

Yaponiya və ABŞ-ın Hokkaydodakı əvvəlki təlimləri 2021-ci ilin dekabrında keçirilib.