Azərbaycanda ötən il qeydə alınan ilkin vərəmli xəstələrin sayı açıqlanıb.

Elmi-Tədqiqat Ağciyər Xəstəlikləri İnstitunun direktoru Həqiqət Qədirova bildirib ki, ölkədə ilkin xəstələrin sayı 2 535 nəfər təşkil edir.

O qeyd edib ki, həmin xəstələrdən 1 467-si bakteroloji təsdiqlənmiş ilkin xəstələr, 555 nəfəri kliniki təsdiqlənmiş ilkin xəstələrdir: "İlkin vərəmli xəstələr arasında kişi xəstələrin sayı üstünlük təşkil edir (66,3 faiz). Yaş və cins üzrə bölgüyə gəlincə, ən çox xəstələnmə halı 18-29 yaş arasənda qeydə alınır. Onlar arasında 448-i kişi, 261-i qadındır. 0-14 yaş arasında 41 nəfəri kişi, 36-sı qadındır. 60 yaşdan yuxarı olanların 241-i kişi 146-sı qadındır".

İnstitut direktoru əlavə edib ki, ötən il ağciyər vərəmi ilə xəstələnmə halı 19,6 faiz, ağciyərdən kənar vərəmlə xəstələnmə halı isə ümumi xəstələrin 5,1 faizini təşkil edib: "2021-ci ildə uşaq və yeniyetmələrin vərəmlə xəstələnmə göstəricisi 191 nəfər olub. Ötən il 1 128 nəfər təkrar vərəmə yoluxub.

Dərmana davamlı vərəmdən müalicə bağlı 964 nəfər müraciət edib, 658 nəfərdə xəstəlik aşkarlanıb. İlkin xəstələrin 90 faizi İİV müayinəsindən, 98 %-i isə ART terapiyadan keçib. 2020-ci ildə vərəmdən 430 nəfər ölüb".