Sentyabrın 18-də futbol üzrə Azərbaycan Premyer Liqasında IV tura start verilib.

Turun açılış matçı Qəbələdə şəhərin eyniadlı komandası ilə “Səbail” arasında baş tutub. Qarşılaşma”Qəbələ”nin 5:0 hesablı qələbəsi ilə yekunlaşıb. “Qırmızı-qaralar”ın heyətində Rövlan Muradov (65′), Ülvi İsgəndərov (83′), Ehtiram Şahverdiyev (89′), Rafael Utriq (90+1′) və İsnik Alimi (90+4′) fərqləniblər.

Həmin gün keçirilən ikinci matçda “Zirə” klubu “Sabah”la qarşılaşıb. “Zirə İdman Kompleksi”ndə keçirilən qarşılaşma 1:1 hesabı ilə yekunlaşıb. Oyunda meydan sahiblərinin legioneri Mohamed Hamdaui 49-cu dəqiqədə hesabı açıb. “Sabah”ın futbolçusu Şpiro Periçiç 83-cü dəqiqədə qonaqların bərabərlik qoluna imza atıb.

IV turun daha bir oyunu sentyabrın 19-da baş tutub. Son ölkə çempionu “Neftçi” “Balcell Arena”da autsayder “Keşlə”ni qəbul edib. Matç meydan sahiblərinin 3-0 hesablı qələbəsi ilə başa çatıb. Oyunda qolları 36-cı dəqiqədə Sezar Meza Kolli, 50-ci dəqiqədə “ağ-qaralar”ın yeni transferi Ramon Maçado və 68-ci dəqiqədə İsmayıl Zülfüqarlı vurub.

Qeyd edək ki, tura sentyabrın 20-də keçiriləcək “Qarabağ” – “Səbail” matçı ilə yekun vurulacaq. “Azərsun Arena”da keçiriləcək qarşılaşma saat 19:00-da başlayacaq və “CBC Sport” vasitəsilə canlı yayımlanacaq.