Sentyabrın 5-də 2022-ci il dünya çempionatının seçmə mərhələsi çərçivəsində keçirilən Braziliya – Argentina matçı yarımçıq dayandırılıb.

GAZETTE xəbər verir ki, buna səbəb matçın dördüncü dəqiqəsində Braziliya səhiyyə orqanının nümayəndələri ilə hüquq mühafizə orqanlarının əmıkdaşlarının Argentina millisinin 4 oyunçusunu saxlamaq üçün stadiona daxil olmaları olub.

Belə ki, qapıçı Emilyano Martinez, müdafiəçi Kristian Romero və yarımmüdafəçilər Emilyano Bundiya ilə Giovanni Lo Selso Braziliyaya daxil olan zaman İngiltərə ərazisində olmaları barədə məlumat verməyiblər. Daha sonra bu futbolçuların İngiltərə Premyer Liqa klublarında çıxış etmələri aydınlaşdığından onların saxlanılması üçün hüquq mühafizə orqanlarının əməkdaşları oyuna müdaxilə etmək məcburiyyətində qalıblar.

Hadisədən sonra bütün Argentina heyəti soyunub geyinmə otağına yollanıblar. Cənubi Amerika Futbol Konfederasiyası (CONMEBOL) baş vermiş hadisə ilə əlaqədar olaraq matçın təxirə salındığını açıqlayıb.

Qeyd edək ki, Braziliya qanunlarına görə, Böyük Britaniyadan ölkəyə daxil olan şəxs 14 günlük karantin müddətini keçməlidir.