“Tokio-2020” Yay Paralimpiya Oyunlarında bu gün mübarizəyə qoşulan dörd idmançımız da fəxri kürsünün ən yüksək pilləsinə qalxamağı bacarıblar.

GAZETTE xəbər verir ki, qadınlar arasında -57 kq çəki dərəcəsində mübarizə aparan paracüdoçumuz Sevda Vəliyeva finalda Parvina Samandarovu məğlub edərək qızıl medala yiyələnib.

-63 kq çəkidə güləşən digər qadın paracüdoçumuz Xanım Hüseynova həlledici görüşdə İrina Husievanı məğlub etməyi bacarıb və “Tokio-2020”-nin qızıl medalına sahib olub.

Ölkəmizin aktivinə daha bir qızıl medalı 81 kq-da Hüseyn Rəhimli yazdırıb. Paracüdoçumuz final görüşündə Davurxom Karomatovu məğlub edərək paralimpiadanın qızıl medalını əldə edib.

Günün son sevindirici xəbəri isə paraatletimiz Həmid Heydəridən (F57) gəlib. Belə ki, nizə atma növündə ölkəmizi təmsil edən Həmid 51,42 m. nəticə ilə  XVI Yay Paralimpiya Oyunlarının qızıl medalını qazanmaqla yanaşı dünya rekorduna da imzala atmış olub.

Qeyd edək ki, buna qədər paracüdoçularımız Şəhanə Hacıyeva (48 kq), Vüqar Şirinli (60 kq) və 100 metr məsafəyə üzgüçülük yarışlarında Raman Saleh paralimpiadanın qızıl, digər paracüdoçumuz Namiq Abaslı (66 kq) və pauerliftinqçimi Pərvin Məmmədov (49 kq) isə bürünc medala sahib olmuşdular.

Yay Paralimpiya Oyunlarında arxada qalan 4 gündən sonra aktivində 9 medal (7 qızıl, 2 bürünc) olan Azərbaycan yığması medal sıralamasında 7-ci pillədə qərarlaşıb. 

Xatırladaq ki, sentyabrın 5-dək davam edəcək “Tokio-2020”-də ölkəmizi idmanın 6 növündə 47 kateqoriya üzrə rekord sayda – 36 idmançı təmsil edir ki, atletlərimizin də 24-ü kişi və 12-si qadındır.