Bu gün Serbiya, Bolqarıstan, Xorvatiya və Rumıniya ev sahibliyi etdiyi qadın voleybolçular arasında Avropa çempionatında Azərbaycan millisi mübarizəyə başlayır.

GAZETTE xəbər verir ki, 24 komandanın iştirakı ilə təşkil olunan qitə çempionatında Azərbaycan yığmasının yer aldığı A qrupunun oyunlarını Serbiyada keçirəcək.

Avropa çempionatında komandamızın heyətində Ayşən Abduləzimova, Olena Xarçenko, Kseniya Pavlenko, Yana Doroşenko, Kristina Besman, Şəfaqət Alışanova, Nilufər Ağazadə, Anastasiya Mertsarova, Mariya Kirilyuk, Marqarita Stepanenko, İlhamə Əliyeva, Bəyaz Alıyeva, Yuliya Kərimova, Anastasiya Bayduk çıxış edəcəklər. Gənc oyunçuların da cəlb olduğu komandada 4 voleybolçumuz ilk dəfə Avropa çempionatında mübarizə aparacaq. Bu yarışda milli komandamıza Vüqar Əliyev rəhbərlik edəcək. V.Əliyevə Eldar Yusubov, Emin Əbilov və Sinişa Popek kömək edəcəklər.

Komandamız qrupda ilk oyununu Belçika yığmasına qarşı keçirəcək. Belqraddakı “Stark Arena”da keçiriləcək görüş yunanıstanlı hakim Aleksandros Milonakisə həvalə olunub. Ona macarıstanlı Aqnes Batkai-Katona kömək edəcək. Görüş Bakı vaxtı ilə saat 19:00-da start götürəcək.

Yığmamız avqustun 21-də Bosniya və Herseqovina, ayın 22-də Rusiya, iki gün sonra Serbiya, avqustun 25-də isə Fransa ilə qarşılaşacaq.

Komandamızın bütün oyunları İctimai Televiziya (İTV) vasitəsilə canlı yayımlanacaq

Qeyd edək ki, reqlamentə əsasən qrupda ilk dörd yeri tutacaq komanda turnirin pley-off mərhələsinə vəsiqə qazanacaq.

Xatırladaq ki, qadın volleybolçulardan ibarət Azərbaycan yığması ardıcıl olaraq 9-cu dəfədir Avropa çempionatında iştirak edir.