Faktdır ki, güclü, qüdrətli ordusu olan hər bir dövlətin müstəqilliyi də sarsılmaz və əbədidir. Azərbaycanın zəngin dövlətçilik tarixində güclü, mütəşəkkil, peşəkar və yüksək döyüş hazırlığına malik ordunun yaradılması, formalaşdırılması və inkişafı məhz Ümummilli Lider Heydər Əliyevin adı ilə bağlıdır.

Güclü siyasi iradəyə, yüksək sərkərdəlik məharətinə malik Dahi şəxsiyyətin rəhbərliyi ilə milli ordumuzun yaradılmasına ötən əsrin 90-cı illərində elə Naxçıvanda başlanılıb. Ümummilli Lider Heydər Əliyev tərəfindən əsası qoyulmuş müasir ordu quruculuğu siyasəti bu gün Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev tərəfindən uğurla davam etdirilir.

Dünyanın ən güclü 50 ordusu sırasında yer alan Şanlı Azərbaycan Ordusunun, həm silah arsenalı, həm də maddi-texniki bazası hər ötən gün genişlənir, şəxsi heyətin sosial-məişət şəraiti yaxşılaşır, mənəvi-psixoloji hazırlığı və döyüş ruhu daha da yüksəlir. Ordumuzun bu gücə qovuşmasında xalq-ordu birliyinin mühüm rolu vardır. Xalqla ordu arasında möhkəm əlaqənin, sarsılmaz birliyin ən mükəmməl nəticəsini bütün dünya düz beş il öncə öz gözləri ilə gördü. Məhz bu prinsipləri əsas götürərək, məğlubedilməzliyi və qələbə əzmini daha da artan Azərbaycan Ordusunun şəxsi heyəti bütün döyüş tapşırıqlarının öhdəsindən layiqincə gələrək, 30 ilə yaxın müddətdə işğal altında qalan torpaqlarımızı düşmən tapdağından azad etməyə nail oldu. 44 günlük Vətən Müharibəsi kimi tarixə düşən Zəfər marafonu Azərbaycanın tam qələbəsi, Ermənistanın isə kapitulyasiyası ilə nəticələndi. Bu dövr ərzində 300-ə yaxın kənd, 5 şəhər, 4 qəsəbə, çoxsaylı strateji yüksəkliklər işğaldan azad olundu.

Ali Baş Komandan, Prezident İlham Əliyevin rəhbərliyi ilə Azərbaycan Ordusu canı-qanı bahasına Ermənistan ordusunun məğlubedilməzliyi barədə illərdir formalaşdırılmış mifi 44 günə dağıtdı, bütün qüvvələri Azərbaycan xalqının iradəsi ilə hesablaşmağa vadar etdi, Azərbaycanın ərazi bütövlüyü bərpa olundu. Azərbaycanın əldə etdiyi qələbə və apardığı hərbi əməliyyatlar, həm texniki imkanlar, həm də operativ addımlar, əməliyyatların hazırlanması və icra edilməsi baxımından bu gün də dünyada öyrənilir. Bu, yeni nəsil müharibə üsuludur, planlaşdırma, texniki təchizat, texnologiyaların tətbiqi, əməliyyatların düzgün planlaşdırılması və həyata keçirilməsi, hərbçilərimizin döyüş qabiliyyətinin, əzminin, əhval-ruhiyyəsinin  yüksək səviyyədə olmasından xəbər verir. 

Yusif Abdullayev
Neftçala rayonu