Bakı şəhərində Azərbaycan, Rusiya və İran arasında nəqliyyat, energetika və gömrük sahələrində əməkdaşlıq məsələlərinə həsr olunan üçtərəfli görüş keçirilib. Azərbaycan Respublikası Baş nazirinin müavini Şahin Mustafayev, Rusiya Federasiyası Hökuməti sədrinin müavini Aleksey Overçuk və İran İslam Respublikasının yol və şəhərsalma naziri Fərzanə Sadeqin iştirakı ilə keçirilən tədbir çərçivəsində üç ölkənin müvafiq qurumlarının nümayəndələri arasında görüşlər təşkil olunub.

Gömrük xidmətlərinin nümayəndə heyətlərinin işçi görüşündə tranzit yük daşımalarının artırılmasına birgə səy göstərilməsi məqsədilə gömrük orqanlarının əməkdaşlığının gücləndirilməsinə dair fikir mübadiləsi aparılıb.

Həmçinin “Şimal-Cənub” beynəlxalq nəqliyyat dəhlizinin qərb marşrutu üzrə Azərbaycan-Rusiya və Azərbaycan-İran dövlət sərhədlərindəki buraxılış məntəqələrində mövcud vəziyyət, sərhədkeçmə proseslərinin sürətləndirilməsi, yük axınlarının səmərəli şəkildə idarə edilməsi, məlumat mübadiləsi ilə bağlı məsələlər müzakirə olunub.

Görüş çərçivəsində “Azərbaycan Respublikası, Rusiya Federasiyası və İran İslam Respublikası arasında tranzit yük daşımalarının artırılmasına birgə səy göstərilməsi məqsədilə gömrük orqanlarının qarşılıqlı fəaliyyəti üzrə üçtərəfli işçi qrup haqqında” Əsasnamə və görüşün protokolu imzalanıb.