20 sentyabr tarixində “EcoHub” ictimai birliyinin təşkilatçılığı, Coca-Cola, Ekologiya və Təbii Sərvətlər Nazirliyi və Azərbaycan Dövlət Neft Şirkətinin (SOCAR), “Carlsberg Azerbaijan”, “McDonald's”, “PwC Azərbaycan”-nın tərəfdaşlığı ilə ənənəvi olaraq keçirilən “Xəzəri Qoruyaq!” adlı genişmiqyaslı ekoloji aksiya başa çatıb. 

Gazette.az xəbər verir ki, ölkədə ekoloji durumun yaxşılaşdırılması, əhalinin bu sahədə maarifləndirilməsi və ətraf mühitə məsuliyyətli yanaşma vərdişlərini təbliğ etmək məqsədilə baş tutan son aksiyaya müxtəlif dövlət və özəl qurumların əməkdaşları könüllü şəkildə qoşulublar.

Xəzər sahilində müşahidə olunan güclü küləyə baxmayaraq, aksiyada iştirak edən könüllülər sahilin tullantılardan təmizlənməsində fəal iştirak ediblər.

1 sentyabr tarixindən etibarən Xəzərin Lənkəran, Astara, Neftçala, Xaçmaz, Şabran, Siyəzən və Sumqayıt çimərliklərini əhatə edən, 20 sentyabr tarixində Bilgəh çimərliyində yekunlaşan aksiyada 1300-dən çox könüllü 3,5 hektar ərazini 5 ton tullantıdan təmizləyib.

Aksiyanı dəstəkləyən təşkilatlar arasında isə Azərbaycan Dövlət Reklam Agentliyi, “Təmiz Şəhər” ASC, “Global Media Group”, ABŞ-nin Azərbaycandakı səfirliyi, “AmCham”, “ASAN Könüllüləri” Təşkilatı, Azərbaycan Könüllü Təşkilatları İttifaqı, ATGTİ, Azərbaycan Skautlar Assosiasiyası, “Yaşıl ASAN”, “ABŞ Təhsilli Azərbaycan Məzunları” ictimai birliyi, “Global Shapers Shamakhi Hub”, “Freken Bok”( Biosphere Corporation), “Smile” və Azərbaycan Jurnalistlər Şəbəkəsi var.

Xatırladaq ki, “Xəzəri Qoruyaq!” şüarı ilə keçirilən ekoloji aksiya bütün dünyada qeyd edilən Beynəlxalq Sahilyanı Təmizlik Günü çərçivəsində təşkil edilib. 1986-cı ildə təsis edilən Beynəlxalq Sahilyanı Təmizlik Günü dünyanın 100-dən çox ölkəsində qeyd olunur. Yer kürəsində su hövzələri sahillərinin tullantılardan təmizlənməsinə yönələn ən irimiqyaslı beynəlxalq könüllü hərəkatı Azərbaycanda “Xəzəri Qoruyaq!” şüarı ilə artıq 16 ildir ki, təşkil olunur.