Sentyabrın 5-də “Coca-Cola” şirkəti, Azərbaycan Dövlət Su Ehtiyatları Agentliyi (ADSEA) və Şamaxı Rayon İcra Hakimiyyətinin nümayəndələri Şamaxı rayonunun Mərzəndiyə kəndinə su çəkilişini qeyd etmək üçün kənd sakinləri ilə görüş keçiriblər.

Şamaxı RİH-nin rəhbəri Tahir Məmmədov, “Coca-Cola Azərbaycan” şirkətinin baş direktoru Rəna Məmmədova, ADSEA-i sədrinin birinci müavini Xəyyam Məmmədov və ADSEA Regional Su Meliorasiya Xidmətinin rəisi Zakir Quliyevin iştirakı ilə keçirilən görüşdə dövlət və şirkət nümayəndələri “Şamaxı rayonunun Mərzəndiyə kəndinin su təminatının yaxşılaşdırılması” layihəsinin icrasının tamamlanmasını qeyd edib və kənd sakinlərini təbrik ediblər. 

Layihə “EcoHub” ekoloji platformasının təşəbbüsü ilə “Coca-Cola” Fondunun dəstəklədiyi “Dayanıqlı Su Təşəbbüsləri” Proqramı çərçivəsində həyata keçirilib.

Ötən ilin dekabrında start verilən layihə çərçivəsində Pirsaat su mənbəyindən kəndə uzanan 7 km uzunluğunda müxtəlif diametrli magistral su kəmərinin tikintisi tamamlanıb, su mənbəyi sahəsində nasos aqreqatları quraşdırılaraq elektrik təchizatı ilə təmin edilib və kəndin içində 60 kubmetrlik su çəni quraşdırılıb. Daha sonra kənd daxilində şəbəkə xətlərinin çəkilişi yekunlaşdırılıb, hər evə sayğaclı və davamlı su verilməsi həyata keçirilib.

Nəticədə, kəndin 1350 sakini təmiz su ilə təmin edilib və kəndə çəkilən suyun illik həcmi 146 milyon litr olaraq hesablanıb.

“Coca-Cola” Şirkətinin baş direktoru Rəna Məmmədova Coca-Cola Fondunun su layihələrinin dəstəklənməsinin vacibliyini qeyd edib: “ “Coca-Cola” fəaliyyətdə olduğu hər bir ölkədə cəmiyyətin inkişafına, icmaların yaşayışının yaxşılaşmasına daim dəstək olub.  Biz çox şadıq ki, “Coca-Cola” Fondunun dəstəklədiyi Qlobal Su Çağırışı proqramı çərçivəsində “Mərzəndiyə kəndinin su təminatının yaxşılaşdırılması” lahiyəsi vasitəsilə 1350 sakinin təmiz su əldə etməsinə kömək olduq və bundan qürur duyuruq. Bu mühüm layihənin qısa zamanda həyata keçirilməsinə görə Su Ehtiyatları Agentliyinə, Şamaxı Rayon İcra Hakimiyyətinə və “EcoHub” platformasına təşəkkür edirik”.

Azərbaycan Dövlət Su Ehtiyatları Agentliyi sədrinin birinci müavini Xəyyam Məmmədov  isə layihənin davamlı olması üçün çalışacaqlarını bildirib: “Mərzəndiyə kəndini su ilə təmin etmək üçün böyük işlər görüldü. Layihənin icrası bir neçə ay çəkdi və nəhayət, biz uğurlu nəticə əldə etmişik. Kəndin bütün sakinlərini təbrik edirəm. İnanıram ki, tərəfdaşlarımızla birgə belə uğurlu layihələrin sayı çox olacaq”.

Şamaxı RİH rəhbəri Tahir Məmmədov rayon əhalisinin problemlərinin hər zaman dövlətin diqqətində olduğunu və problemlərin həlli üçün bütün imkanlardan istifadə edilərək işlərin davam etdirildiyini qeyd edib: “Mərzəndiyə kəndinə su çəkilişi münasibətilə hər birinizi təbrik edirəm. Dövlətimizin diqqəti və özəl sektorun dəstəyi ilə sakinlərin gündəlik həyatı daha da yaxşılaşır. Kəndin su problemi artıq həll olunub. İndi hər evdə təmiz su var. Bu işin uğurla yekunlaşmasında əməyi olan bütün tərəfdaşlarımıza minnətdaram”.

ADSEA Regional Su Meliorasiya Xidmətinin rəisi Zakir Quliyev də Şamaxı və ətraf rayonların bəzi kəndlərində su çatışmazlığı olduğunu və bu istiqamətdə işləri davam etdirdiyini bildirib: “Bu gün çoxdan gözlənilən gündür. Nəhayət Mərzəndiyə sakinləri davamlı su ilə təmin edildilər. Bu kənd camaatının həyatını dəyişəcək məqamdır. Kəndin əsas ehtiyacı, əsas məsələsi bu idi. Mən də öz növbəmdə kəndə suyun çəkilməsində əməyi olan hər bir quruma və şəxsə dərindən minnətdarlığımı bildirirəm.”

Dövlət və şirkət nümayəndələri Mərzəndiyə kənd sakinlərinə görülən işlərlə bağlı məlumat verib, kənd ərazisini gəziblər. Daha sonra kəndin ağsaqqal nümayəndəsi, tanınmış ziyalı aşıq Ağamurad Şirvanlının evinə baş çəkərək sakinlərlə səmimi söhbət ediblər.