Mayın 27-də Bakı Atıcılıq Mərkəzində start götürəcək Dünya Kubokunda Azərbaycanı təmsil edəcək stend atıcılarının adları müəyyənləşib.

Azərbaycan Atıcılıq Federasiyasından verilən məlumata görə, iyunun 7-dək davam edəcək nüfuzlu yarışa qatılacaq atıcıların adlarına Azərbaycan Kubokunda aydınlıq gəlib.

Ölkədaxili yarışda atıcı kişilər stend atıcılığının səngər və dairəvi, qadınlar və qarışıq komanda kateqoriyalarında yarışıb.

15 atıcı müxtəlif kateqoriyalarda fərqlənərək, diplom və təltiflərlərlə mükafatlandırılıb.

Kişilərin yarışında səngər stendində Əlimirzə Quliyev birinci, Əli Hüseynli ikinci, Mirmömin Ağazadə üçün olub. Qadınlarda Aydan Camalova, Alina Rəfixanov və Ülviyyə Eyvazova müvafiq yerləri tutublar.

Dairəvi stenddə kişilərdə Niyaz Ağazadə, Fuad Qurbanov və Cavid Həsənov, qadınlarda Nurlana Cəfərova, Riqina Meftaxetdinova və Sevda Nəcəfova fəxri kürsüyə qalxıb.

Qarışıq komanda yarışının səngər stendi növündə Əlimirzə Quliyev və Əmrahova cütlüyü, dairəvi stenddə isə Nurlana Cəfərova və Fuad Qurbanovdan ibarət cütlük qalib adını qazanıb.

Azərbaycan Milli Olimpiya Komitəsinin və Azərbaycan Atıcılıq Federasiyasının vitse-prezidenti Zemfira Meftahətdinova yarışın atıcılıq idmanında yeni nəslin yetişməsi barədə yüksək ümidlər verdiyini açıqlayıb: "Atıcılığın özünəməxsus xüsusiyyətlərindən biri də bu yarışla məşğul olmaq üçün uşaq vaxtlarından başlamağın lazım olmamasıdır. Belə üstünlük bizə imkan verir ki, yeniyetmələrimiz arasında bu istiqamətdə istedad və bacarığı olanları aşkarlayıb, ölkəmizi beynəlxalq yarışlarda təmsil etməyə hazırlayaq”.

Federasiyanın baş katibi Emin Cəfərov atıcılığın təkcə idman növü olmadığını söyləyib: "Bu, həm də diqqət, səbr və məqsədə gedən yolu doğru hədəfləyən vərdişlər toplusudur. Biz gənclərimizi bu sahəyə cəlb etməklə, onlarda həm də bu xüsusiyyətlərin möhkəmlənməsini arzulayırıq”.