Norveçdə arxeoloqlar ölkə tarixində Vikinq dövrünə aid ən böyük sikkə xəzinəsini — 3000-ə yaxın gümüş sikkə aşkar ediblər. Tapıntı Esterdalen bölgəsindəki Rena yaxınlığında, bir tarlada tapılıb və ərazidə qazıntı işləri hələ də davam edir.

Ölkə.Az "KHM"ə istinadən xəbər verir ki, sikkələrin əksəriyyəti İngiltərə və Almaniya mənşəlidir, lakin aralarında Danimarka və Norveç nümunələrinə də rast gəlinir. Onların arasında Böyük Knut, II Etelred, III Otton və Sərt Haraldın dövrlərinə aid sikkələr var. Mütəxəssislərin qiymətləndirməsinə görə, xəzinə Norveçdə xarici sikkələrin aktiv istifadə edildiyi 980-ci illərdən 1040-cı illərə qədər olan dövrü əhatə edir.

Arxeoloqlar hesab edirlər ki, bu tapıntı bölgədə X-XIII əsrlərdə hasil edilən və Avropaya ixrac olunan dəmir ticarəti ilə bağlı ola bilər. Bunun qarşılığında ölkəyə daxil olan gümüş belə bir xəzinə şəklində toplanıla bilərdi.

Tapıntı yeri mühafizə altına alınıb və ziyarətçilər üçün bağlanıb. Rəsmi qurumlar bu kəşfi tarixi baxımdan böyük əhəmiyyətə malik hadisə adlandırır və artifakt barədə vaxtında məlumat verərək onun qorunub saxlanmasına kömək edən könüllü axtarışçılarla əməkdaşlığın vacibliyini vurğulayırlar.