Haitidə baş vermiş güclü zəlzələ nəticəsində ölənlərin sayı durmadan artır.

Gazette.az xəbər verir ki, yerli rəsmilər yeraltı təkanlar nəticəsində həlak olanların sayının hazırda 304 nəfər olduğunu qeyd ediblər. Lakin dağıntının miqyasını nəzərə alaraq ölü sayının artacağı ehtimal olunur. Açıqlamada xeyli sayda yaralının və itkin düşənin olduğu bildirilir.

Qeyd edək ki, avqustun 14-də Haitidə yerli vaxtla səhər saatlarında Rixter şkalası ilə 7,2 bal gücündə zəlzələ baş verib. Zəlzələnin ocağı Peti-Tru-de-Nip yaşayış məntəqəsinin yaxınlığında, yerin 10 kilometr dərinliyində yerləşib.

Xatırladaq ki, ada ölkəsi olan Haitidə 2010-cu ildə baş vermiş 7 bal gücündə zəlzələ nəticəsində 200 mindən çox insan dünyasını dəyişmiş, 300 minə yaxın yerli sakin isə müxtəlif cür bədən xəsarətləri almışdı.