Yeni Azərbaycan Partiyası Neftçala Rayon təşkilatı tərəfindən Yeni Azərbaycan Partiyasının təsis konfransının keçirilməsinin 33-cü ildönümü münasibətilə “33 ilin zirvəsi: Sabitlikdən Zəfərə” adlı ümumrayon tədbiri keçirilib.

Tədbirdə Neftçala Rayon İcra Hakimiyyətinin başçısı Mirhəsən Seyidov, YAP Neftçala Rayon təşkilatının sədri Ülvi Fərzəliyev və aparat işçiləri, rayonun idarə və müəssisə rəhbərləri, ərazi partiya təşkilatlarının sədrləri, partiya veteranları, fəal üzvlər və  gənclər  iştirak ediblər.

İlk öncə Ümummilli Lider Heydər Əliyevin Neftçala şəhərinin mərkəzində ucaldılan abidəsi ziyarət olunub, önünə gül dəstələri düzülüb, ruhu ehtiramla yad olunub.

Tədbir Azərbaycan Respublikasının Dövlət Himninin səsləndirilməsi və Ulu Öndər Heydər Əliyevin və Azərbaycanın ərazi bütövlüyü, konstitusiya quruluşu uğurunda canından keçən qəhrəman şəhidlərimizin xatirəsinin yad edilməsi ilə başlayıb.

İlk olaraq çıxış edən YAP Neftçala rayon təşkilatının sədri Ülvi Fərzəliyev tədbir iştirakçılarını Yeni Azərbaycan Partiyasının təsis edilməsinin 33-cü ildönümü münasibətilə təbrik edərək partiyanın yaranma tarixi, inkişaf mərhələləri və müasir dövrdəki uğurları haqqında ətraflı məlumat verib. Bu əlamətdar tarixin Azərbaycanın siyasi tarixində dönüş nöqtəsi olduğunu, keçən qısa müddət ərzində Azərbaycanın siyasi səhnəsində liderlik mövqeyi qazandığını bildirib. Partiyanın  təkcə siyasi fəaliyyətlə kifayətlənmədiyini, həm də milli ideologiyanın formalaşmasına, dövlətçilik ənənələrinin möhkəmləndirilməsinə mühüm töhfələr verdiyini diqqətə çatdırıb. 

Daha sonra partiyanın veteran üzvü Oktay Kərimov, Cəngən kənd tam orta ümumtəhsil məktəbinin tarix müəllimi Şəhrəbanu Əhmədova, şəhid Xalid Orucovun bacısı, YAP-ın gənc üzvü Sevinc Orucova  çıxış edərək Yeni Azərbaycan Partiyasının Azərbaycanın siyasi həyatında əvəzsiz rolundan, partiyanın təkcə ölkəmizdə deyil, Qafqazda, hətta bütün dünyada yüksək nüfuza malik olduğunu qeyd ediblər. YAP-ın  sıralarının gündən-günə artmasının, sosial bazasının daha da möhkəmlənməsinin Ulu Öndər Heydər Əliyev ideyalarına etimadın və Prezident, Yeni Azərbaycan Partiyasının sədri İlham Əliyevin siyasətinə dəstəyin bariz nümunəsi olduğunu vurğulayıblar.

Neftçala Rayon İcra Hakimiyyətinin başçısı Mirhəsən Seyidov çıxış edərək vurğulayıb ki, Ulu Öndər Heydər Əliyevin siyasi irsini mərhələli şəkildə və böyük uzaqgörənliklə davam etdirən Prezident cənab İlham Əliyevin rəhbərliyi altında Yeni Azərbaycan Partiyası bu gün ölkəmizin ictimai-siyasi həyatında aparıcı qüvvə kimi müstəsna rol oynayır. 33 illik fəaliyyət dövrü ərzində YAP təkcə siyasi təşkilat olaraq deyil, həm də dövlətçiliyimizin möhkəmləndirilməsi, sosial rifahın yüksəldilməsi, bölgələrdə infrastrukturların yenilənməsi və cəmiyyətin bütün sahələrində sistemli islahatların həyata keçirilməsi istiqamətində böyük nailiyyətlərə imza atıb. Partiyanın ideoloji xəttinin mərkəzində dövlətə sədaqət, vətəndaşa xidmət və milli maraqların qorunması dayanır və məhz bu prinsiplərə sadiqlik nəticəsində YAP bu gün həm ölkə daxilində, həm də beynəlxalq müstəvidə etibarlı, güclü və yenilikçi siyasi qüvvə kimi tanınır.  

Tədbirdə, həmçinin, Yeni Azərbaycan Partyiyasının 33 illik fəaliyyət xronikasını özündə əks etdirən videoçarx nümayiş olunub. Tədbir Şirvan-Salyan Regional Mədəniyyət İdarəsinin Neftçala rayon üzrə nümayəndəliyi tərəfindən hazırlanan musiqili-bədii proqramla davam etdirilib.

Sonda Neftçala Rayon İcra Hakimiyyəti və YAP Neftçala rayon təşkilatı tərəfindən bir qrup şəxs “Yeni Azərbaycan Partiyasının təsis edilməsinin 33-cü ildönümü və rayonun ictimai-siyasi həyatında fəal iştirakına görə” Fəxri Fərmanla təltif olunub. Partiyaya yeni qəbul edilən üzvlərə vəsiqələr təqdim olunub.

Tədbir Yeni Azərbaycan Partiyasının Himni ilə başa çatıb.