Göyçayın Kürdəmiş kəndində Vətən müharibəsi şəhidi Mayılov Rüfət Bəhram oğlunun şəhadətə ucalmasının beşinci ildönümü qeyd edilib. Mərasim iştirakçıları şəhidin əziz xatirəsini ehtiramla yad edərək məzarı üzərinə gül dəstələri düzüblər.

Anım tədbirində şəhidin keçdiyi döyüş yolu, göstərdikləri qəhrəmanlıq və Vətənə sədaqəti barədə geniş məlumat verilib. Vurğulanıb ki, Rüfət Mayılovun fədakarlığı, igidliyi gələcək nəsillərə örnəkdir. Onun həyat yolu təkcə bir ömür hekayəsi deyil, Azərbaycan igidliyinin və Vətən sevgisinin təcəssümüdür. Qeyd olunub ki, məhz Rüfət kimi qəhrəman oğullarımızın sayəsində 44 günlük Vətən müharibəsi Azərbaycan tarixində qızıl hərflərlə yazıldı. Qazanılan Zəfər xalqımızın birliyi, həmrəyliyi və şəhidlərin misilsiz qəhrəmanlığı hesabına mümkün oldu. Şəhidlərin əziz xatirəsi daim uca tutulacaq, onların ruhu hər bir azərbaycanlının qəlbində əbədi yaşayacaq.

Şəhidin ailə üzvləri göstərilən diqqət və qayğıya görə Prezident İlham Əliyevə və rayon rəhbərliyinə minnətdarlıqlarını bildiriblər.

Anım mərasiminin sonunda kənd tam orta məktəbinin şagirdləri şəhidlərin xatirəsinə həsr olunmuş ədəbi-bədii kompozisiya ilə çıxış ediblər.

Xatırladaq ki, şəhid Rüfət Mayılov 2001-ci il 31 yanvarda Göyçay rayonunun Kürdəmiş kəndində dünyaya göz açıb. 3 aprel 2019-cu ildə həqiqi hərbi xidmətə çağırılıb. Vətən müharibəsi zamanı qəhrəmanlıqla döyüşərək 2020-ci il 30 sentyabrda Füzuli istiqamətində şəhidlik zirvəsinə ucalıb. Ölümündən sonra Prezidentin Sərəncamı ilə “Vətən uğrunda” və “Füzulinin azad olunmasına görə” medalları ilə təltif olunub.