Rusiyanın məşhur cizgi filmi “Maşa və Ayı”nın Azərbaycan haqqında çəkdiyi “Cırtdan” adlı buraxılışı yutubdan platformasından silinib.

GAZETTE xəbər verir ki, videonun “YouTube”dan hansı səbəbdən silinməsi barədə dəqiq məlumat mövcud olmasa da, ehtimal olunur ki, səbəb çoxsaylı erməni şikayətləridir.

Belə ki, cizgi filmində Azərbaycan xəritəsinin tam və həqiqətə uyğun olaraq göstərilməsi, ermənilərin də uzun müddət öz adlarına çıxarmağa çalışdıqları dolma barədə danışılması məğlub ölkənin nümayəndələrini qıcıqlandırmaya bilməzdi. Güman olunur ki, elə bu səbəbdən də ermənilərin kütləvi şikayətləri əsasında Maşanın “Cırtdan” nağılı platformadan silinib.

Qeyd edək ki, avqustun 12-də “Maşa və Ayı”nın buraxılışında personaj Maşanın dili ilə Azərbaycan barəsində danışılmış, ölkəmizin xəritəsi, milli mətbəximizin nümunələri olan çörəkdən, dolmadan bəhs edilmiş, şəkərbura, paxlava nümayiş olunmuşdu. Bundan başqa, cizgi filmdə məşhur “Cücələrim” mahnısı da səsləndirilmiş, Azərbaycanın qədim sənətkarlığı pinəçilik barədə məlumat verilmişdi.