8 yanvar 2021-ci il tarixindən bu günə qədər “YAŞAT” Fondunun Çağrı Mərkəzinə 55 mindən çox vətəndaş zəngi daxil olub.

Fonddan GAZETTE-yə verilən məlumata görə, bu zənglər zamanı şəhidlərimizin ailə üzvlərinin və yaralıların ümumilikdə 8 mindən çox müraciəti qeydiyyata alınaraq aidiyyati üzrə yönləndirilib. Bunların 2300-ə yaxını şəhidlərimizin ailə üzvlərinin, 6000-dən çoxu isə yaralılarımızın müraciətləridir.

Xatırladaq ki, 8110 Çağrı Mərkəzinə zənglər tam ödənişsizdir.

“YAŞAT” Fondu Azərbaycan Prezidentinin 8 dekabr 2020-ci il tarixli 1203 nömrəli Fərmanına əsasən yaradılmışdır. Fond Azərbaycanın ərazi bütövlüyünün müdafiəsi ilə əlaqədar əlilliyi müəyyən olunmuş hərbi qulluqçuların və şəhid olmuş şəxslərin ailələrinin üzvlərinin sosial müdafiəsi sahəsində dövlət tərəfindən həyata keçirilən tədbirlərə əlavə dəstək verilməsi üçün şəffaf, effektiv və əlçatan platformanın formalaşdırılması məqsədilə yaradılıb.

Qeyd edək ki, 8 yanvar 2021-ci il tarixində “YAŞAT” Fondunun yashat.gov.az portalı istifadəyə verilib və Fondun 8110 Çağrı Mərkəzi fəaliyyətə başlayıb.