Süni intellektin əsas təhlükəsi texniki deyil, psixolojidir.

Nobel mükafatı laureatı fizik Saul Perlmutter Norveç Mərkəzi Bankı İnvestisiya Fondunun baş direktoru Nikolay Tangenlə podkast müsahibəsində deyib.

Onun sözlərinə görə, süni intellekt insanlara bir mövzunu, əslində, dərk etmədən öyrənmiş kimi hiss etdirə və yalançı inam yarada bilər.

Kainatın genişlənməsinin sürətləndiyini kəşf edən alim xüsusilə tələbələr və informasiya ilə işləyən mütəxəssislər üçün risklərə diqqət çəkir.

Perlmutter qeyd edir ki, süni intellekt cavablarını çox vaxt həddindən artıq inamlı tonda təqdim edir və bu da tənqidi düşüncəni zəiflədə bilər.

Perlmutter süni intellektin insan zehni əməyini çox erkən mərhələdə əvəz etməsinin təhlükəli olduğunu bildirib. Onun fikrincə, bu vəziyyət fərdlərin müstəqil təhlil və problem həlletmə bacarıqlarını zəiflədə bilər.

Alim vurğulayır ki, həll süni intellektdən imtina etmək deyil. Əksinə, bu texnologiya düşüncəni əvəz edən yox, onu dəstəkləyən bir alət kimi istifadə olunmalıdır.

Perlmutter süni intellektdən gələn məlumatların sorğulanmalı, səhv ehtimalının daim nəzərə alınmalı olduğunu və elmi yanaşmanın əsas götürülməli olduğunu bildirir.(qafqazinfo)