Sentyabrın 21-də İstanbulun Atatürk Beynəlxalq Hava Limanında “Teknofest” – Aerokosmik və Texnologiya Festivalının açılışı olub.

Açılış mərasimində nəqliyyat, rabitə və yüksək texnologiyalar naziri Rəşad Nəbiyev, ölkəmizin müxtəlif dövlət qurumlarının rəhbər şəxsləri, nümayəndələri və ali təhsil müəssisələrinin tələbələri də iştirak ediblər.

“Teknofest” tədbiri Türkiyə Respublikası Sənaye və Texnologiya Nazirliyinin və “Baykar Makina” şirkətinin texniki direktoru Selçuk Bayraktarın rəhbərlik etdiyi Türkiye Teknoloji Takımı Vakfının (T3 Vakfı) birgə təşkilatçılığı və qardaş ölkənin 60-dan çox dövlət qurumu, ali məktəbi və özəl şirkətinin tərəfdaşlığı ilə 2018-ci ildən etibarən hər il keçirilir.

Məqsəd Türkiyədə aviasiya, kosmik sənaye, rəqəmsal iqtisadiyyat kimi sahələrin gənclər arasında təbliği, bu sahələrdə sahibkarlığın təşviq edilməsi, festival çərçivəsində təşkil olunan yarışlar vasitəsilə gənc mühəndislərin bilik və bacarıqlarının üzə çıxarılması, eləcə də milli texnologiyaların geniş ictimaiyyətə təqdim olunmasıdır.

Nəqliyyat, Rabitə və Yüksək Texnologiyalar Nazirliyinin təşkilatçılığı ilə “Teknofest” tədbirində milli pavilyonumuzda 11 Azərbaycan startapı nümayiş etdirilir.

“Zəfər yolu” kosmik stansiya modeli, “Idrak Technology Transfer”in layihələri, “Zərbə”, “İqlime”, “Safee Bike”, “Viastellar”, “HealWith”, “SmogFree”, “Battle of Bots”, “Smart Parking IoT” və “GSM Smart Electric – AMR ST 13” startap məhsulları bu sırada yer alır.

Startaplarımız kosmik sənaye, hərb, təhsil, tibb, kənd təsərrüfatı, nəqliyyat, video oyunlar kimi müxtəlif sahə və istiqamətləri, ümumilikdə yeni texnologiyaları əhatə edir.

Türkiyənin sənaye və texnologiya naziri Mustafa Varank milli pavilyonumuzu ziyarət edib, Azərbaycan startapları ilə tanış olub.

Qeyd edək ki, “Teknofest” – Aerokosmik və Texnologiya Festivalı sentyabrın 26-da başa çatacaq.