Türkiyənin Artvin vilayətinin Şavşat rayonunda işəgötürən 100 min türk lirəsi maaş təklif etməsinə baxmayaraq aşpaz tapa bilməyib.

Plat.az xəbər verir ki, Şavşat Karagöl turizm ərazisində fəaliyyət göstərən obyektin sahibi Atıf Çiçək yay mövsümündə işlərin artması səbəbindən aşpaz axtarmağa başlayıb.

O, müxtəlif platformalarda iş elanı yerləşdirərək aylıq 100 min lirə maaş təklif edib. Lakin buna baxmayaraq, müəssisədə çalışmaq üçün aşpaz tapılmayıb.

Çiçək bildirib ki, turizm mövsümünün intensiv keçməsi ilə əlaqədar xüsusilə mətbəxdə işləyəcək təcrübəli əməkdaşlara ehtiyac artıb. Onun sözlərinə görə, yüksək maaş təklifi də işçi çatışmazlığının aradan qaldırılmasına kifayət etməyib.

“Məncə, ölkəmizdə iş problemi yoxdur, iş seçmək problemi var. 100 min lirə maaş verməyimizə baxmayaraq aşpaz tapa bilmirik”, – deyə Çiçək bildirib.

Hadisə Türkiyədə xüsusilə turizm və xidmət sektorunda təcrübəli və ixtisaslı işçi çatışmazlığı məsələsini yenidən gündəmə gətirib.